Samarqand iqtisodiyot va servis instituti raxmatulla xaitboyev ekologik turizm

8-mavzu. EKOLOGIK TURIZM RIVOJLANGAN XORIJ
DAVLATLARINING TAJRIBALARI
Reja:
8.1. Dunyo mamlakatlaridagi ekoturizm.
8.1. Dunyo mamlakatlaridagi ekoturizm
Jahon turizmida jadallik bilan 
rivojlanib borayotgan ekoturizmda 
yevropaliklar Afrika, Osiyo, 
Janubiy Amerikaning inson qadami 
tegmagan tabiiy landshaftlari tomon 
oqib bormoqda. Ekologik turizm 
geografiyasida Laos, Keniya, 
Tanzaniya, Ekvador, Kosta-Rika, 
Nepal, Avstraliya, Yangi Zelandiya 
va Janubiy Afrika Respublikasi yetakchilik qilmoqda. AQSHdagi 
Yellouston milliy parkidagi geyzerlar vodiysiga har yili 2 mln.
turist kelmoqda. Kamachatkadagi Koronotskiy qo‘riqxonasidagi 
Geyzerlarga esa har yili 3000 turist kelib ketadi.
Ekoturizmning dunyoda juda ommaviylashgan davlatlari 
Lotin Amerikasidagi Kosta-Rika, Argentina, Ekvador, Braziliya 
va Peru hisoblanadi. Osiyoda ekoturizmning liderlari Hindiston 
va Nepal, va albatta ekoturizmda tengsiz davlatlar Avstraliya va 
Yangi Zelandiyadir. Yevropaning shimoliy davlatlari Islandiya, 
Norvegiya va Finlandiyada ekoturizm kuchli rivojlangan. Markaziy 
Yevropa davlatlarida ekoturizm asosan tabiat qo‘riqxonalarida 
jadal rivojlanmoqda. Rossiyaning Tog‘li Oltoy, Kamchatka, 
Baykal, Kareliya va o‘rmonzorlarida ham ekoturizm hamda 
qishloq turizmi jadal rivojlanmoqda.
Kanada.
Kanadada milliy parklarni tashkil qilish 1885-yilda 
tashkil qilingan Banf milliy parkidan boshlandi. 1990-yillarning 
o‘rtalarida kanada davlatida 37 ta yirik milliy parklar tashkil 
qilingan edi. Bu milliy parklarga hozirgacha 15 mln. ekoturist 
tashrif qildi. Kanadaning barcha provinsiyalarida tabiiy rezervatlar 
tashkil qilingan. Bu rezervatlarning vazifalari noyob, sonlari 
tobora kamayib borayotgan biologik turlarni muhofaza qilish 
va ko‘paytirishdan iborat. Shuningdek, Kanada milliy tabiiy 
rezervatlarning ko‘pligi jihatidan ham jahonda birinchi o‘rinni 
egallaydi, bu milliy tabiiy rezervatlarning soni 1000 ta. Jahon 
miqyosida milliy parklardagi tabiiy ekotizimlarni saqlab qolish 
va muhofaza qilishda lider davlatlardan hisoblangan Kanada 
davlatida 5 ta dengiz tabiiy qo‘riqxonalari ham tashkil qilingan.