Ozbek-Tariyx-1-70-(каракалпак). indd

Soraw hám tapsırmalar
:
1. Tómendegi kesteni toltırıń. Ózbekstannıń geosiyasiy halatı haq-
qında, qolaylı hám qolaysız sebeplerin keltiriń
.
Qolaylı
Qolaysız
2. Qosımsha ádebiyatlardan paydalanıp, 2018-jılı yanvarda Prezident 
Shavkat Mirziyoevtiń Ózbekstannıń shet mámleketlerdegi elshileri 
menen ushırasıwı hám onda belgilengen wazıypalar boyınsha maǵ-
lıwmat toplań.
3. Ózbekstan sırtqı siyasatınıń principlerin aytıp beriń.
4. Ózbekstan Respublikasınıń «Sırtqı siyasiy xızmeti koncepciyası»nda 
Oraylıq Aziya regionı máselesinde ne aytılǵan?
18-tema.
 Ózbekstannıń Oraylıq Aziya elleri menen óz ara birge islesiwi
Oraylıq Aziya elleri menen birge islesiwdiń jolǵa qoyılıwı. 
Ózbekstan 
sırtqı siyasatınıń jetekshi baǵdarlarınan biri Oraylıq Aziyadaǵı jańa 
ǵárezsiz mámleketler — Qazaqstan, Qırǵızstan, Tájikstan, Túrkmenstan 
menen doslıq, birge islesiw baylanısların bekkemlewge qaratılǵan. 
?
8 – Ózbekstan tariyxı, 11-klass

---

114
Regiondaǵı bes mámleket ortasında uqsas tárepleri kóp. Tariyxımız, 
mádeniyatımız, tilimiz, dinimizdiń birligi, tamırlarımızdıń tutasıp 
ketkenligi bul mámleketler xalıqların bir-birine jáne de jaqınlastırıwdıń 
tiykarı bolıp tabıladı.
Jańa tariyxıy sharayatlarda júzege kelip atırǵan jámiyetlik-siyasiy 
procesler Oraylıq Aziya elleri xalıqlarınıń kelip shıǵıwı, olardıń tariyxı, 
ózine tán turmıs tárizi hám jaqın qońsıshılıq qatnasıqlarına hár 
qashanǵıdan da basqasharaq qarawdı turmıstıń ózi talap ete basladı. 
1993-jıldıń yanvarında Elimiz Birinshi Prezidenti Islam Karimov 
baslaması menen Oraylıq Aziya mámleketleri basshılarınıń Tashkent 
ushırasıwı shólkemlestirildi. Joqarı dárejedegi bul ushırasıwda Oraylıq 
Aziya Doslıq Awqamına tiykar salındı. Bes mámleket — Qırǵızstan, 
Qazaqstan, Ózbekstan, Tájikstan, Túrkmenstan basshıları Doslıq 
Awqamı haqqındaǵı kelisimge qol qoyıstı. Bunı region xalıqları quwanısh 
penen qarsı aldı hám qollap-quwatladı.
Oraylıq Aziya mámleketleri basshıları 1993-jılı Qazaqstan Res-
publikasınıń Qızıl Orda qalasında, 1999-jılı Nókis qalasında, 1995-
jılı Túrkmenstan Mámleketiniń Tashawız qalasında, 1995-jılı jáne 
Nókis qalasında Aral teńizi mashqalasına arnalǵan ushırasıwlar 
ótkizdi hám bul boyınsha ámeliy jumıslar alıp barıla baslandı. 1999-jılı 
Túrkmenstannıń Ashxabad qalasında Araldı qutqarıw Xalıqaralıq fondı-
nıń májilisi bolıp ótti. Májiliste ekologiyalıq apatshılıq regionındaǵı 
jaǵdaydı turaqlastırıw boyınsha birge islesiwdi rawajlandırıw máseleleri 
dodalandı. Mámleket basshıları óz ara birge islesiw, regionallıq qáwip-
sizlik hám xalıqaralıq kólemdegi máseleler boyınsha da pikir almastı.
2017-jılı Ózbekstan Prezidenti Shavkat Mirziyoev baslaması me-
nen Ózbekstannıń qońsı mámleketler menen qatnasıǵında jańa dáwir 
baslandı. Sol jıldıń ózinde Qazaqstan, Túrkmenstan hám Qırǵızstan 
mámleketlerine Ózbekstan Prezidentiniń rásmiy saparları ámelge 
asırıldı. 2018-jılı mart ayında bolsa Tájikstanda joqarı dárejedegi 
ushırasıw ámelge asırıldı. Bunnan tısqarı, 2017-jılı Samarqandta BMSh 
qáwenderliginde «Oraylıq Aziya: birden bir tariyx hám ulıwma keleshek, 
turaqlı rawajlanıw hám ósiw jolındaǵı birge islesiw» temasında ánjuman 
boldı. Onda 500 shet el qatnasıwshıları qatnastı
.