Microsoft Word Tursunboyev S. O'zbek teatri tarixi. Majmua

XURSHID 
(1892—1960)
 
Shoir,  tarjimon,  atoqli  dramaturg,  O’zbekistonda  xizmat  ko’rsatgan  san’at  arbobi 
(1940)  Xurshid  (Shamsiddin  Sharafiddinov)  1892-yili  Toshkentning  Sebzor  dahasi 
Shokirguzar  mahallasining  bog’bon  oilasida  tavallud  topgan.  Eski  maktab  va  madrasada 
tahsil ko’radi, 1910-yili bir boyga prikazchik bo’lib Andijonga ketadi va 1918-yilga qadar 
o’sha boyning do’konida xizmat qiladi. 
Xurshid  adabiyotga  shoir  sifatida  kirib  keldi.  1920-yili  u  o’zbek  Davlat  namuna 
teatriga suflyor bo’lib ishga keladi va shu davrdan uning ijodiy hayoti teatr bilan bog’lanib 
qoladi,  1933—1948-yillari  Alisher  Navoiy  nomidagi  opera  va  balet  teatrida  adabiy 
emakdosh, umrining oxirgi yillari O’zbekiston Fanlar akademiyasi til va adabiyot institutida 
ilmiy xodim bo’lib ishlaydi, 1960-yili u vafot etadi. 
Xurshid  musiqiy  drama  janrining  asoschilaridan  biri  sifatida  o’zbek  teatrining 
shakllanishiga munosib hissa qo’shgan. 
Turli yillarda U. Hojibekovning «Layli va Majnun», «Arshin mol-olon», H. Jovidning 
«Iblis»,  «Shayx  San’on»,  I. Mamatqulizodaning  «O’liklar»,  F. Shillerning  «Qaroqchilar», 
«Makr  va  muhabbat»  kabi  o’ttizga  yaqin  pyesalarni  o’zbek  tiliga  tarjima  qildi,  «Yomon 
o’rtoq»,  «Juvonbozlik  qurboni»,  «Kichik  askar»,  «Oybonu»,  «Siyovush»  singari  original 
pyesalar yaratdi. 
Xurshidning  dramaturglik  iste’dodi  «Farhod  va  Shirin»  (1922),  «layli  va  Majnun» 
(1923) musiqali dramalarida yaqqol namoyon bo’ldi. Ular Navoiyning mashhur dostonlari, 
xalq  ertak  va  afsonalarini  atroflicha  o’rganish  asosida  dunyoga  kelgan  pyesalar  bo’lib, 
o’zbek dramasi janrini rivojlantirishda bosqichli voqealarga aylandi.