Кўчмас мулк ва мулк ҳУҚУҚи амалий қўлланма

135
2 .3 .2 . ТРАНСПОРТ ВОСИТАЛАРИДАН ИШОНЧНОМАЛАР ОРҚАЛИ 
ФОЙДАЛАНИШ ВА ТАСАРРУФ ҚИЛИШ
Транспорт воситаларининг техник хусусиятлари ушбу мулкдан бошқа 
шахсларнинг ҳам фойдаланиш имконини беради. Бундай фойдаланиш 
транспорт воситаси мулкдорининг рухсати – ишончномаси орқали амалга 
оширилади.
Ўзбекистон Республикаси Вазирлар Маҳкамасининг 2006 йил 7 мартдаги 
38-сонли “Автомототранспорт воситаларини сотиб олиш, улардан фойдаланиш 
ва уларни бошқа шахсга беришни тартибга солишга доир қўшимча чора-
тадбирлар тўғрисида”ги қарорининг 2-бандига кўра 2008 йил 1 декабрдан 
нотариуслар томонидан автомототранспорт воситаларидан фойдаланиш 
ва (ёки) уларни тасарруф этишга оид ишончномаларни нотариал тасдиқлаш 
фақат «Давлат белгиси» давлат ишлаб чиқариш бирлашмаси томонидан 
тайёрланадиган, ҳимоя даражасига, серияга, тартиб рақамига ва ҳудудий кодга 
эга бўлган қатъий ҳисобот бериладиган гербли (махсус) бланкаларда амалга 
оширилади.
Агар ишончнома биттадан ортиқ ишончли шахсга берилган тақдирда, у 
ишончли шахслар сони бўйича гербли (махсус) бланкада расмийлаштирилади.
Ишончнома матнига қўйиладиган талаблар
Ўз ваколатини бошқа шахсга ишониб топшириш тартибида берилган 
ишончнома матнида асосий ишончнома тасдиқланган сана, жой ва реестр 
рақами, асосий ишончнома олган, берган ва ваколат ишониб топширилаётган 
шахснинг фамилияси, исми, отасининг исми ва доимий ёки вақтинча прописка 
қилинган (ҳисобга олинган) манзили, асосий ишончнома билан берилган барча 
ёки айрим ваколатларини (масалан, автомототранспорт воситасини сотиш, 
бошқариш, таъмирлаш, ҳайдаб олиб бориш ва шу кабилар) берилаётганлиги 
ҳақида аниқ кўрсатилиши керак. 
Ишончномалар 10 кун муддатда Ўзбекистон Республикаси Ички ишлар 
вазирлигининг ДЙҲХХ органларида ҳисобга қўйилиши керак.
Транспорт воситаларидан ишончномасиз фойдаланиш (бошқариш) 
жавобгарликка тортиш учун асос бўлади.
Транспорт воситаларидан фойдаланиш ёки уни тасарруф этиш 
ҳуқуқини тасдиқловчи ҳужжатлари бўлмаган ҳайдовчиларнинг транспорт 
воситаларини бошқариши, худди шунингдек ишончномаларни белгиланган 
тартибда рўйхатдан ўтказмасдан (ҳисобга қўймасдан) транспорт 
воситаларини бошқариш - энг кам иш ҳақининг иккидан бир қисми миқдорида 
жарима солишга сабаб бўлади.

---