Кичик гуруҳ (3-4 ёш)

Йирик моторикани ривожлантириш. 3-4 ёшли бола юриш, югуриш, 
сакраш, юмалатиш, ирғитиш, илиб олиш, эмаклаш, тирмашиш, мувозанат 
сақлаш каби асосий ҳаракат машқларини бажара олади. Бу ёшдаги болада 
турли йўналишларда юриш ва югуриш, турли баландликлардан сакраш, 
коптокларни бир-бирига қаратиб юмалатиш, икки қўллаб пастдан, кўкрак 
олдидан, бошидан олдинга ошириб ирғитишни ривожлантириш. 
Асосий ҳаракатларга доир машқлар.
Юриш машқлари. Қаторда тўғри юриш, йўналишни ўзгартириб юриш, 
навбатма-навбат юриш; чизиқ бўйлаб жуфт бўлиб қўл ушлашиб юришга 
ўргатиш.
Югуриш машқлари. Йўналишни ва тезликни ўзгартириб югуриш; 1 дақиқа 
давомида аста-секин югуриш; югуриш чоғида бурилиш; ҳуштак бўйича 
тўхташ; доира бўйлаб бир ўзи ва жуфтликда қўл ушламасдан қатор бўлиб 
югуриш; югураётганда бирданига тўхташ ва мувозанатни сақлаш. 
Сакраш машқлари. Тўсиқларни ошиб ўтиш; икки оёқни жуфтлаб турган 
жойда сакраш, баландликка сакрашга ўргатиш. 
Юмалатиш, ирғитиш, илиб олиш машқлари. Юмалатиб юборилган 
буюмни қувиб етиш; полга, деворга урилган коптокни илиб олиш; 
коптокни ўнг ёки чап қўл билан қайтариш; ерда юмалатиш; коптокни икки 
қўл билан баландга кўтариб, маълум нишонга (саватга ёки челакка) отиши 
учун имконият яратиш.
Эмаклаш ва тирмашиш машқлари. Тўғри йўналиш бўйича қўл кафтлари 
ва тиззалари ёрдамида, гимнастика курсиси устида тўрт оёқлаб 10 м гача 
эмаклаш. 
Умумривожлантирувчи машқлар.
Қўл мускуллари учун машқлар. Дастлабки ҳолат: гавда тик тутилган, 
оёқлар елка кенглигида очилган, қўлларни юқорига ва ёнга узатиш. Букиш 
ва чўзиш, қўлларни орқага яшириш, бош устида, кўкрак олдида чапак 
чалиш; қўлларни сувда сузаётгандек ҳаракатлантириш.
Оёқлар учун машқлар. Турган жойида юриш; олдинга, орқага ва ёнга 
қадам ташлаш; бир оёқда турган ҳолда иккинчи оёқни букиш ва ёзиш; 
ўтириб туриш; оёқ учида кўтарилиш; товонда туриш, оёқ бармоқларини 
қимирлатиш; чалқанча ётган ҳолда оёқларда велосипед машқини 
қилдириш.