O’zbtkiston respublikasi oliy va o’rta maxsus ta’lim vazirligi

O‘yin taktikasi ham katta ahamiyatga ega. Hujum va himoyada o‘yinchilar turli harakatlarining maqsadga muvofiqligi va samaradorligining yuqori darajada bo‘lishi, ko‘p jihatdan uchrashuv natijasini belgilaydi. Buning uchun nafaqat texnik usullarni yaxshi egallash, balki o‘yinchilarning tezkor-taktik tafakkuri ham zarur. Bu o‘yinchilarning intellektual rivojlanish darajasiga va ularning nazariy tayyorgarliklariga yuqori talablar qo‘yadi.
Voleybolchilarning o‘zaro taktik harakatlari jamg‘armasi juda salmoqli. Biroq amalda eng yaxshi jamoalar ham turli sabablarga ko‘ra bu jamg‘armaning bir qismidangina foydalanadilar. Jamoalar harakatlarining eng ko‘p darajada samaradorligiga intilish voleybolchilarning o‘yin funksiyalari bo‘yicha ixtisoslashuviga olib keladi. O‘zaro qarshi kurash taktikasi shunday tuzilgan, har bir o‘yinchi o‘zining o‘yin vazifasiga mos doirada, o‘zining eng kuchli tomonlaridan foydalanishi kerak.
Ko‘pchilik jamoalar toifasining tenglashuvi sharoitida turli-tuman psixologik muammolarni yaxshi hal eta olgan tomon yengib chiqadi. O‘yinchilarning shaxsiy xarakteristikalariga, jumladan, ularning temperamenti va xarakteriga yuqori talablar qo‘yiladi. Voleybolchilar asab tizimining kuchi va chidamliligi, o‘yin harakatlarining ishonchliligini ta’minlovchi psixologik zo‘riqishlarga bardoshlilik, psixologik zo‘riqish vaziyatlarida xato qilmaslik qobiliyati, shuningdek, o‘yinda g‘alaba ta’minlanishida muhim bo‘lgan irodalilikning namoyon bo‘lishi alohida ahamiyat kasb etadi.
O‘yin davomida vaziyatlarning tez o‘zgaruvchanligi diqqatning turli tomonlariga (barqarorlik, hajm, taqsimlanganlik), oddiy va murakkab munosabat bildirishlar, voqealarni baholashdagi aniqlik o‘z vaqtida qaror qabul qilinishi kabilarga yuqori talablar qo‘yadi.
Voleybolchilarning harakatlari uyushganligi va samaradorligi sotsial psixologiya, ya’ni dori-darmon, o‘yinchilarning o‘zaro ta’sirlari va mosliklari, kichik norasmiy guruhlar, jamoada qulay psixologik muhit shakllanishi masalalarining hal etilishi kabilar bilan belgilanadi.