O‘zbekiston respublikasining shaharsozlik kodeksi 1-bob. Umumiy qoidalar 1-modda. Ushbu Kodeksning maqsadi

5-bob. Qurilishni nazorat qilish va amalga oshirish
26-modda. Qurilishni nazorat qilish
Qurilishni nazorat qilish shaharsozlik faoliyati subyektlari tomonidan qurilishga tayyorgarlik
ko‘rish, shaharsozlik hujjatlarini ishlab chiqish, qurilish-montaj, ishga tushirish-sozlash ishlarini
bajarish, obyektni foydalanishga qabul qilib olish davrida shaharsozlik to‘g‘risidagi qonun
hujjatlariga hamda shaharsozlik normalari va qoidalari talablariga rioya etilishini ta’minlash
maqsadida amalga oshiriladi.
Shaharsozlik faoliyati obyektlarini qurish chog‘ida quyidagilarning amalga oshirilishi
ta’minlanishi kerak:
qurilish ustidan davlat nazorati;
buyurtmachining texnik nazorati;
ishlab chiquvchining mualliflik nazorati;
pudratchining ichki nazorati.
27-modda. O‘zbekiston Respublikasi Qurilish vazirligi huzuridagi Qurilish sohasidagi
nazorat inspeksiyasining va uning hududiy inspeksiyalarining vakolatlari
Shaharsozlik faoliyati sohasidagi davlat nazorati O‘zbekiston Respublikasi Qurilish vazirligi
huzuridagi Qurilish sohasidagi nazorat inspeksiyasi (bundan buyon matnda Inspeksiya deb
yuritiladi) va uning hududiy inspeksiyalari (bundan buyon matnda hududiy inspeksiyalar deb
yuritiladi) tomonidan amalga oshiriladi.
Inspeksiya va hududiy inspeksiyalar o‘z vakolatlari doirasida:
mahalliy davlat hokimiyati organlariga va maxsus vakolatli davlat organining hududiy
bo‘linmalariga shaharsozlik to‘g‘risidagi qonun hujjatlarini buzgan holda qabul qilingan qarorlarni
bekor qilish haqida taqdimnomalar kiritadi;
binolar va inshootlarning zilzilabardoshliligiga ta’sir qiluvchi, shuningdek fuqaro hayoti va
sog‘lig‘iga tahdid soluvchi konstruktiv qoidabuzarliklar aniqlangan hollarda qurilish-montaj
ishlarini to‘xtatib turadi hamda demontaj ishlari amalga oshirilishini talab qiladi;
qonun hujjatlarida nazarda tutilgan qurilish sohasida ruxsat berish tartib-taomillariga rioya
qilinmagan va aniqlangan huquqbuzarliklarni bartaraf etish bo‘yicha kamida ikkita ko‘rsatma
bajarilmagan hollarda qurilish-montaj ishlarini to‘xtatib turadi va demontaj ishlarini olib borish
to‘g‘risidagi da’vo bilan sudga murojaat qiladi;
yuridik va jismoniy shaxslarga shaharsozlik faoliyati sohasida aniqlangan qoidabuzarliklarni
bartaraf etish bo‘yicha bajarilishi majburiy bo‘lgan ko‘rsatmalarni, ularni bajarishning shaharsozlik
faoliyati obyektidagi huquqbuzarliklarni bartaraf etish uchun zarur bo‘lgan mutanosib
muddatlarini, lekin ko‘pi bilan oltmish kunni belgilagan holda, beradi;

---

shaharsozlik faoliyatini amalga oshirishga doir litsenziyalarning hamda ruxsat beruvchi
hujjatlarning amal qilishini to‘xtatib turish, tugatish yoki ularni bekor qilish to‘g‘risidagi masalani hal
etish uchun tegishli davlat organlari hamda tashkilotlarga taqdimnomalar yuboradi;
shaharsozlik faoliyati obyektlarida binolar hamda inshootlarning zilzilabardoshliligiga ta’sir
qiluvchi, shuningdek inson hayoti va sog‘lig‘iga tahdid soluvchi sifatsiz qurilish materiallari,
konstruksiyalari hamda buyumlari qo‘llanilganligi aniqlangan hollarda, qurilish materiallarini,
konstruksiyalarini va buyumlarini ishlab chiqarishni, realizatsiya qilish hamda qo‘llashni to‘xtatib
turish haqida tegishli davlat organlari va tashkilotlarga taqdimnomalar yuboradi;
qurilayotgan obyektlarga moneliksiz kiradi va davlat nazorati vazifalarini amalga oshiradi;
yuridik va jismoniy shaxslar tomonidan shaharsozlik to‘g‘risidagi qonun hujjatlari, shaharsozlik
normalari hamda qoidalari talablariga, qurilishda qo‘llaniladigan qurilish materiallari,
konstruksiyalari va buyumlarining texnik jihatdan tartibga solish sohasidagi normativ hujjatlar
talablariga muvofiq bo‘lishiga rioya etilishi ustidan, shuningdek texnik va mualliflik nazorati
yuritilishi ustidan tanlab o‘tkaziladigan davlat nazoratini amalga oshiradi;
shaharsozlik to‘g‘risidagi qonun hujjatlari buzilgan taqdirda ma’muriy bayonnomalarni
rasmiylashtiradi va ma’muriy huquqbuzarliklar to‘g‘risidagi ishlarni ko‘rib chiqadi;
o‘z vakolatlariga kiradigan masalalarni hal etish uchun zarur bo‘lgan materiallarni,
ma’lumotlar va axborotni vazirliklar, davlat qo‘mitalari, idoralar hamda mahalliy ijro etuvchi
hokimiyat organlaridan so‘raydi va oladi;
mahalliy ijro etuvchi hokimiyat organlarining, nodavlat notijorat tashkilotlarining vakillarini,
ilmiy-texnik va ilmiy-tadqiqot tashkilotlarining ekspertlari hamda mutaxassislarini davlat nazorati
tartibida o‘tkaziladigan tekshiruvlarga jalb etadi;
qurilish obyektlaridagi avariyalar holatlarini tekshirish bo‘yicha idoralararo komissiyalar ishida
ishtirok etadi;
qurilish-montaj ishlarini amalga oshiruvchi yuridik va jismoniy shaxslarga konstruksiyalarning
ayrim elementlarini, uzellar va detallarni ochish va qayta yopib qo‘yish, poydevorlar ostidagi
tuproqni, qo‘llanilgan qurilish materiallarini, konstruksiyalarini, buyumlarini hamda muhandislik
kommunikatsiyalarini sinash yuzasidan topshiriqlar beradi, shuningdek tegishli xulosa tayyorlash
uchun ekspertlar va mutaxassislarni jalb qiladi.
Inspeksiya va hududiy inspeksiyalar qonun hujjatlariga muvofiq boshqa vakolatlarni ham
amalga oshirishi mumkin.