O‘zbekiston respublikasining shaharsozlik kodeksi 1-bob. Umumiy qoidalar 1-modda. Ushbu Kodeksning maqsadi

21-modda. Qoraqalpog‘iston Respublikasi Vazirlar Kengashining, viloyatlar va Toshkent
shahar ijro etuvchi hokimiyat organlarining shaharsozlik faoliyati sohasidagi vakolatlari
Qoraqalpog‘iston Respublikasi Vazirlar Kengashi, viloyatlar va Toshkent shahar ijro etuvchi
hokimiyat organlari o‘z vakolatlari doirasida:
shaharsozlik to‘g‘risidagi qonun hujjatlariga rioya etilishi ustidan davlat nazoratini amalga
oshiradi, shuningdek shaharsozlik faoliyati obyektlarining but saqlanishini ta’minlaydi;
shaharlar hududlarining ijtimoiy-iqtisodiy rivojlanish ko‘rsatkichlari va istiqboldagi
urbanizatsiya jarayonlari asosida aholini oqilona joylashtirish, muhandislik, transportga oid va
ijtimoiy infratuzilmalarni rivojlantirish masalalarini hal qiladi;
mahalliy ahamiyatga molik obyektlarni qurishga doir shaharsozlik hujjatlarini ishlab chiqish
bo‘yicha buyurtmachi vazifalarini bajaradi va bu obyektlarning moliyalashtirilishini ta’minlaydi;
shaharsozlik faoliyati obyektlarini qurish to‘g‘risida qarorlar qabul qiladi;
o‘z hududidagi shaharsozlik faoliyatini, agar bu faoliyat shaharsozlik to‘g‘risidagi qonun
hujjatlari talablariga mos kelmasa, cheklaydi, to‘xtatib turadi yoki taqiqlaydi. Tadbirkorlik
subyektlarining shaharsozlik faoliyatini cheklash, to‘xtatib turish va taqiqlash sud tartibida amalga
oshiriladi, bundan favqulodda vaziyatlar, epidemiyalar hamda aholining hayoti va sog‘lig‘i uchun
boshqa real tahdid yuzaga kelishining oldini olish bilan bog‘liq holda faoliyatni o‘n ish kunidan ko‘p
bo‘lmagan muddatga cheklash, to‘xtatib turish hollari mustasno;

---

reklama va axborot obyektlarini (konstruksiyalarini) joylashtirish masalalariga doir
shaharsozlik faoliyatini nazorat qiladi hamda rejalashtiradi, shu jumladan reklama va axborot
obyektlari (konstruksiyalari) qurilishi uchun ajratiladigan yer uchastkalari ro‘yxatini shakllantiradi,
ularni pasportlashtirishni amalga oshiradi;
aholi punktlarining bosh rejalarini ishlab chiqishni tashkil etadi va ularning jamoatchilik
muhokamasini ta’minlaydi;
qishloq aholi punktlarining bosh rejalarini, aholi punktlari hududlarining qismlarini batafsil
rejalashtirish loyihalarini (bundan buyon matnda batafsil rejalashtirish loyihasi deb yuritiladi)
hamda mavzelarni, kichik dahalarni va aholi punktlari rejalashtirilgan tuzilmasining elementlarini
qurish loyihalarini (bundan buyon matnda qurish loyihasi deb yuritiladi) tasdiqlash uchun tegishli
hokimiyat vakillik organlariga kiritadi;
viloyatlar hududlarini rejalashtirish tarhlari, muhandislik, transportga oid va ijtimoiy
infratuzilmalarni rivojlantirish, shuningdek obodonlashtirish tarhlari va loyihalari ishlab chiqilishi
hamda amalga oshirilishini tashkil etadi;
tumanni (tumanlar guruhlarini) rejalashtirish loyihalarini tasdiqlash uchun tegishli vakillik
organlariga kiritadi;
mahalliy ahamiyatga molik alohida tartibga solinadigan shaharsozlik faoliyati obyektlarining
chegaralarini hamda tegishli obyektlar hududlarida shaharsozlik faoliyatini tartibga solish
tartibotini belgilaydi;
aholi punktlarini qurish qoidalari loyihalarini tasdiqlash uchun tegishli hokimiyat vakillik
organlariga kiritadi;
aholi punktlari shaharsozlik hujjatlarining, shaharsozlik faoliyati sohasidagi ilmiy
tadqiqotlarning ishlab chiqilishi va moliyalashtirilishini, davlat shaharsozlik kadastri, shaharsozlik
faoliyati obyektlarining monitoringi yuritilishini, kompleks muhandislik qidiruvlari o‘tkazilishini, aholi
punktlarini mikroseysmik hududlashtirish xaritalari tuzilishini, shaharsozlik hujjatlari amalga
oshirilishi yuzasidan monitoring olib borilishini va bu hujjatlarning ekspertizadan o‘tkazilishini
ta’minlaydi;
shaharsozlik faoliyati sohasida qabul qilinayotgan qarorlar to‘g‘risida aholini muntazam
ravishda xabardor qiladi;
o‘zboshimchalik bilan qurilgan imoratlarning qonun hujjatlarida belgilangan tartibda buzib
tashlanishini tashkil etadi.
Qoraqalpog‘iston Respublikasi Vazirlar Kengashi, viloyatlar va Toshkent shahar ijro etuvchi
hokimiyat organlari qonun hujjatlariga muvofiq boshqa vakolatlarni ham amalga oshirishi
mumkin.