O‘zbekiston respublikasida turizm sohasini tiklash va rivojlantirish uchun qulay shart-sharoitlarni yaratish chora-tadbirlari to‘G‘risida

4-bob. Turar-joy egalari va Markazning huquq va majburiyatlari

27. Turar-joy egalari quyidagi huquqlarga ega:

turar-joyni o‘z ixtiyoriga ko‘ra O‘zbekiston Respublikasining turar-joy to‘g‘risidagi qonunchiligida belgilangan me’yorlar doirasida tasarruf etish;

turistlarga turar-joyni ushbu Nizomda belgilangan tartibda uni Reyestrga kiritish yo‘li bilan ijaraga berishi mumkin.

28. Turar-joy egalari qonunchilikka muvofiq boshqa huquqlarga ham ega bo‘lishlari mumkin.

Markaz ushbu Nizomda ko‘zda tutilgan talablarning bajarilishini monitoring qilish maqsadida qoidabuzarlik holatlari aniqlangan holatlardaturar-joy manziliga aniqlangan kamchiliklar va ularni bartaraf etish uchun aniq muddatlar ko‘rsatilgan holda bajarilishi majburiy bo‘lgan ogohlantirish yuborish huquqiga ega.

29. Turar-joy egalari:

ushbu Nizom va boshqa qonun hujjatlari talablariga amal qilishi;

turar-joyda sanitariya qoidalari, me’yorlari va gigiyena normativlari, shuningdek, epidemiyaga qarshi va yong‘in xavfsizligi, gaz va elektr qurilmalaridan foydalanish qoidalariga rioya etilishini ta’minlashi;

Reyestrga kiritilgan ma’lumotlar o‘zgarganligi, shuningdek, o‘z faoliyatini tugatganligi to‘g‘risida uch ish kuni ichida Markazni xabardor qilishi;

yashovchilar tomonidan jamoat tartibi me’yorlari buzilgan hollarda joylardagi huquqni muhofaza qilish organlari bilan o‘zaro bog‘lanib harakat qilishi shart.

turar joy egalari qonun hujjatlariga muvofiq boshqa majburiyatlarga ham ega bo‘lishi mumkin.

30. Markaz:

vaqtinchalik yashash bo‘yicha xizmatlar ko‘rsatish tartibi bilan tanishtirish uchun profilaktika va tushuntirish ishlari hamda boshqa tadbirlarni tashkillashtirishi;

manfaatdor davlat organlari bilan hamkorlikda Turar-joy egalarini favqulodda vaziyatlardagi harakatlar tartibi bilan tanishtirishi;

turar-joy egalarini turizm sohasidagi me’yoriy-huquqiy hujjatlar va normativ hujjatlardagi o‘zgartirish va qo‘shimchalar to‘g‘risida xabardor qilib borishi;

zamonaviy axborot-kommunikatsiya texnologiyalarini ijaraga beruvchi va ijarachilar bilan o‘zaro munosabatlar sohasiga faol ravishda joriy qilib borishi lozim.

Markaz qonun hujjatlariga muvofiq boshqa majburiyatlarga ham ega bo‘lishi mumkin.