O‘zbekiston respublikasida turizm sohasini tiklash va rivojlantirish uchun qulay shart-sharoitlarni yaratish chora-tadbirlari to‘G‘risida

Turar-joylarni ijaraga berishning Yagona elektron reyestrini yuritish va ularni sertifikatlash tartibi to‘g‘risida

NIZOM

1-bob. Umumiy qoidalar

1. Ushbu Nizom amaldagi avtomatlashtirilgan maxsus elektron dasturda (keyingi o‘rinlarda — Dastur) ijaraga beriladigan turar-joylar va yashovchilar hisobini yuritish, shuningdek, ularni sertifikatlashtirish va Turar-joylarni ijaraga berishning yagona reyestrini yuritishning tartibini belgilaydi.

Ushbu Nizom:

jismoniy va yuridik shaxslarga tegishli bo‘lgan, turistlarga o‘ttiz kungacha ijaraga beriladigan turar-joylarni ro‘yxatga olishda O‘zbekiston Respublikasi Davlat soliq qo‘mitasi bilan o‘zaro hamkorlik qilishga;

quyidagi hollarda jismoniy va yuridik shaxslar tasarrufida bo‘lgan, turistlarga o‘ttiz kungacha ijaraga beriladigan turar-joylarni ro‘yxatdan o‘tkazishda;

O‘zbekiston Respublikasiga tashrif buyuruvchi turistlarni o‘ttiz kundan ortiq bo‘lmagan muddatga vaqtincha ro‘yxatdan o‘tkazishda, hududiy ichki ishlar organlariga murojaat qilish hollari bundan mustasno;

turistlarga ijaraga beriladigan turar-joylarni, shu jumladan ijarachilarni soliqqa solish va turistlarni turgan joyi bo‘yicha o‘ttiz kungacha vaqtincha ro‘yxatdan o‘tkazish uchun turar-joylarning ma’lumotlar bazasini shakllantirish va yuritishga;

ijaraga beriladigan turar-joylarni sertifikatlashtirishga tatbiq etiladi.

2. Ushbu Nizomda quyidagi asosiy tushunchalar qo‘llaniladi:

arizachi — ijaraga beriladigan turar-joyning egasi (jismoniy yoki yuridik shaxs) yoki Turar-joylarni ijaraga berishning yagona reyestriga kiritish uchun murojaat qilgan mulkdorning boshqa vakolatli shaxsi;

turar-joy egasi (keyingi o‘rinlarda — ijaraga beruvchi) — turar-joyning ijaraga beruvchisi sifatida Turar-joylarni ijaraga berishning yagona reyestriga kiritilgan shaxs;

turar-joy — jismoniy shaxslarning vaqtincha yashashlari uchun mo‘ljallangan, belgilangan sanitariya, yong‘inga qarshi, texnik va boshqa talablarga javob beradigan ko‘p kvartirali uylardagi xonadonlar, uylar;