O‘zbekiston respublikasi oliy va o‘rta maxsus ta’lim vazirligi samdu oʻzbekiston-finlandiya pedagogika instituti

Topshiriq. Berilgan matnni o‘qing va matn mazmunidan kelib chiqqan holda siz ham maqola yozing.
Misr ehromlari
Nil daryosi g‘arbidagi Giza shahrida 4-Sulola paytida (mil.avv. 2575-2467) qurilgan. Eng eski 7 mo‘jizadan faqatgina Misr ehromlari shu paytgacha deyarli zararlanmasdan saqlanib qolgan. Ehromlardan eng kattasi fir’avn Xufu yoki katta Piramida deb ataladi. Uning egallagan maydoni 4,8 gektar (12 akr)ni tashkil etadi. Qadimgi yunon tarixchisi Gerodotning yozishicha, ehromlar uchun 10 yil joy hozirlashgan, fir’avn qabri joylashgan ehromni tiklash uchun 20 yil davomida 100000 dan ortiq qul ishlatilgan.
Ehromlarning eng yuksagi fir’avn Xufu (Xeops) piramidasidir. Uning balandligi 147 metr, bundan qariyb 5 ming yil ilgari, ya’ni miloddan avvalgi XXVIII asrda qurilgan. Xufu ehromining har bir tomoni 233 metrga teng, atrofini bir marta aylanib chiqish uchun bir kilometrga yaqin yo‘l bosish kerak. Bu ehrom silliqlab tarashlangan va jilo berilgan 2 million 300 mingta ohaktosh plitalaridan tiklangan. Har bir plitaning og‘irligi ikki tonnaga yaqin. Kattaligi jihatidan Xufu ehromidan keyin fir'avn Xafra (Xefren) piramidasi turadi. U Xufu ehromidan 2 metr past. Bu fir'avnga tog‘dek sag‘ana ham kamlik qildi va u ehrom oldida yaxlit qoya tiklatib, unga bosh qismi odam boshiga o‘xshatib ishlangan sher shaklini o‘yishni buyurdi. Bu haykal Sfinks deb ataladi. Sfinks obrazi inson kabi donolik va sher kabi kuchlilik ramzini ifodalaydi. Mahalliy aholi uni “Abul Havl — dahshat otasi” deb yuritadi. Misrdagi bu topilmalar XX asrda butun dunyoga mashhur bo‘lib ketdi. Ayniqsa Tutanxamon sag‘anasining topilishi juda katta shovshuvga sabab bo‘ldi. Bundan XXXII asr muqaddam yashagan bu fir'avnning piramidasi bizning kunlarimizgacha saqlanib qolgan ekan. Tutanxamon ehromi miloddan avval qanday qurilgan bo‘lsa, olimlar ko‘z o‘ngida shundayligicha namoyon bo‘ldi. Maqbara ichidan Qadimgi Misr saroylariga oid anchagina boyliklar — oltin va kumushdan yasalgan haykalchalar, turli idishlar, muhrlar topildi. Maqbaradagi juda ko‘p jihozlar, oltin buyumlar va niqoblar bilan bezatilgan fir'avnning mo‘miyolangan jasadiga ham qo‘l tekkizilmagan edi. Tutanxamon boyliklari jahondagi ko‘p mamlakatlarda namoyish qilindi.