O‘zbekiston respublikasi oliy va o‘rta maxsus ta’lim vazirligi samdu oʻzbekiston-finlandiya pedagogika instituti

36-MAVZU: “ILM MASKANIMIZ HAYOTIDAN”. PUBLITSISTIK MAQOLA VA UNING XUSUSIYATLARI
Ilm maskanimiz hayotidan
Samarqand shahri Osiyoning eng qadimgi ilm-fan o‘choqlaridan biri hisoblanadi. Sohibqiron Amir Temur saltanatining poytaxti bo‘lgan Samarqand shahri o‘rta asrlarda yuksak taraqqiy etgan madaniy markaz darajasiga ko‘tarildi. Bu qadimiy shahardan yetishib chiqqan o‘nlab olimlar dunyo ilm-faniga o‘zlarining munosib hissasini qo‘shishgan.
Har yili minglab mutaxassislar yetishtirayotgan Samarqand davlat universiteti 1927-yil 22-yanvarda tashkil etilgan. Dastlab bu yerda ijtimoiy-siyosiy, fizika, texnika, tabiatshunoslik, tilshunoslik, bo‘limlari ochilib, atigi o‘ntagina professor-o‘qituvchi 65 talabaga dars o‘tish bilan ish boshlagan. Yildan yilga fakultetlar, mutaxassisliklar ko‘payib bordi. Xuddi shuningdek, ta’lim beruvchi professor- o‘qituvchilar, tahsil oluvchi talabalar soni ham ortib bordi. Bugungi kunga kelib Samarqand davlat universitetining to‘qqiz fakultetida mexanika-matematika, o‘zbek filologiyasi, tarix, iqtisodiyot, informatika, rus filologiyasi, geografiya, biologiya, musiqa, fizika, kimyo, ijtimoiy fanlar, huquqshunoslik, jismoniy madaniyat, tojik filologiyasi, boshlang‘ich ta’lim, psixologiya, defektologiya, kasbiy ta’lim kabi yo‘nalishlarda 35 mutaxassislik bo‘yicha ilmiy hamda pedagogik kadrlar tayyorlanmoqda. Mustaqillik davriga kelib “Kadrlar tayyorlash milliy dasturi” talablaridan kelib chiqib har tomonlama yetuk mutaxassislar tayyorlashga e’tibor kuchaytirilmoqda. Hozir universitet kutubxonasida dunyoning ellikdan ortiq tillaridagi uch millionga yaqin qimmatbaho kitoblar, darslik va qo‘llanmalar jamlangan. Ayniqsa, kutubxonaning sharq qo‘lyozmalari bo‘limida dunyo ahamiyatiga molik asarlar saqlanadi. Talabalarga kutubxonaning ikkita filliali va yigirmaga yaqin qiroatxonalari beminnat xizmat qilmoqda.
Universitet talabalari uchun bir nechta yotoqxonalar qurilgan. Fakultetlar va yotoqxonalar atrofida o‘ndan ortiq oshxona, tamaddixona, choyxonalar professor-o‘qituvchilar hamda talabalarga xizmat qiladi.
Samarqand davlat universitetini bitirganlar orasida o‘nlab akademiklar, fan arboblari, davlat arboblari yetishib chiqqan. Bu yerda Hamid Olimjon, Oydin, Mirtemir, Amin Umariy, Usmon Nosir, O‘tkir Rashidov, Sharof Rashidov, Adham Hamdam, Asqad Muxtor, Shukur Sa’dulla, Dushan Fayziy, Omon Matchon, Normurod Narzullayev, Barot Boyqobilov kabi mashhur shoir va yozuvchilar ta’lim olishgan.
Bugungi kunda turli yo‘nalishlar bo‘yicha ta’lim olayotgan talabalar mustaqil O‘zbekiston ilm-fani, madaniyati, shon-u shuhratini dunyoga tanitish maqsadida tinmay izlanmoqdalar, ijod qilmoqdalar, bobokalonlari ilmiy merosini chuqur o‘zlashtirmoqdalar.