O‘zbekiston respublikasi oliy va o‘rta maxsus ta’lim vazirligi samarqand davlat universiteti filologiya fakulteti

Oyi, dadam nega yig‘layaptilar?
Yetti-sakkiz yoshlik chog‘larim, shahar hovlida yashar edik. Dadam mudom
o‘tirib “O‘tgan kunlar”ni yozardilar. Bir kun oyim, odatimizcha, ertalabki choyni
bibimning uyiga hozirladilar-da, erta turib o‘z xonasida yozib o‘tirgan dadamni
choyga chaqirgani chiqib ketdilar. Biz dasturxon tevaragida u kishining chiqishini
kutamiz... Bir vaqt oyim negadir indamay chiqdilar va o‘tirib bizga choy quyib bera boshladilar.
- Abdullani chaqirdingmi, Rahbar?- dadam chiqavermagach, oyimdan so‘radilar bibim.
- Yo‘q.
- Nega?
- O‘g‘lingiz yig‘lab o‘tiribdilar, - dedilar oyim.
Bibim bechora sakrab o‘rinlaridan turib dadamning xonasiga yo‘l oldilar. Kapkatta kishining yig‘lashidan hayratga kelib men ham bibim ortidan ergashdim. Kirsak, darhaqiqat, u kishi yum-yum yig‘lar, kursiga tirsaklanib olib, to‘xtovsiz yozar edilar. Bibim dadamning bu holiga biroz qarab turdilar-da, bir narsani tushundilar, shekilli, indamay meni boshlab orqaga qaytdilar va o‘tirib choyni icha boshladilar, Men bibimdan so‘radim:
- Dadam nega yig‘layaptilar?
- Dadang jinni bo‘lib qolibdi...- javob qildilar bibim va boshqa so‘z aytmadilar. Keynchalik anglasam, o‘shanda dadam o‘z sevikli qahramoni Kumushning fojeali o‘limi paytini tasvirlayotgan ekanlar...
Habibulla Qodiriy
Topshiriq. Topishmoqlarni o‘qing va javobini toping. Topishmoqlarda berilgan so‘zlarning ma’nosiga diqqat qiling.
Qo‘l bilan ekilar,
Og‘iz bilan yig‘ilar.
(Yozish, o‘qish)
Tog‘dan tashladim sinmadi,
Suvga tashladim sindi.
(Qog‘oz)
Sirti tayoq,
Ichi bo‘yoq
(Qalam)
Uzun bo‘yli,
Yo‘rma to‘nli.
(Qamish qalam)
Topshiriq. Quyidagi ma’nodosh so‘zlar qatorini daftaringizga husnixat bilan ko‘chiring va yod oling. Siz ham davom ettiring.
Bemalol, baxuzur, bazur.
Berk, bekik, yopiq.
Boshqa, bo‘lak, o‘zga.
Buyruq, amr, farmon.
Ko‘krak, bag‘ir, siyna, to‘sh
Munosabat, aloqa, robita.
Odam, kishi, inson, bashar.
Ovoz, tovush, un, sado, sas.
Peshona, manglay.
Yagona, yolg‘iz, tanho.
Zavq, maroq, shavq.
Chora, iloj, tadbir.