O‘zbekiston respublikasi oliy va o‘rta maxsus ta’lim vazirligi o‘zbekiston davlat jahon tillari universiteti

2. Tarbiyaning hayot va mehnat bilan bog‘liqligi.
2. Bolani real hayotdan, mehnat faoliyatidan ajralgan holda tarbiyalash mumkin emasligini qadimgi ajdodlarimiz ham yaxshi bilganlar. Tarbiyalanuvchini yoshlikdan ijtimoiy faol hayotga jalb qilish uning jamiyatda tezda o‘z o‘rnini topishiga, tezroq oddiy mehnat ko‘nikmalarini egallab borishiga zamin hozirlaydi. Mehnat faoliyatiga jalb etish kechikkani sayin, bolaning umumiy rivojlanishi ham kechika boradi.

Zero, mehnat faoliyati davomida bola kattalar bilan muloqot qiladi, ularning topshiriq va ko‘rsatmalarini bajaradi, xulq-atvor asoslarini egallaydi. Shu boisdan, bolani oilada, maktabgacha ta’lim muassasasida, umumiy o‘rta ta’lim maktabida mehnat faoliyatiga jalb etib borish yaxshi samara beradi. Oilada bo‘lib o‘tadigan boshqa tadbirlarda, masalan birgalikdagi mehnat jarayoni, to‘y va marosimlarda ishtirok etishi ham bola dunyoqarashini kengaytiradi, kattalar o‘rtasida o‘zini tutish, ular bilan to‘g‘ri muloqot qilish ko‘nikmasini rivolantiradi. Bu ko‘nikma bolaning kelajak faoliyatida qo‘l keladi, albatta. Eng asosiysi, mehnat faoliyatida ishtirok etish mehnatning qadrini bilish, o‘zgalar mehnatini hurmat qilishga o‘rgatadi. Mehnat darsida biron buyumni yasaganda o‘z mehnati mahsulini ko‘rib quvonadi, ruhan ko‘tarinkilikni his qiladi. Mehnat bolaning irodasini chiniqtiradi, qiyinchiliklarga bardosh berishga, kelajakka ishonch bilan yashashga o‘rgatadi.