O‘zbekiston respublikasi oliy va o‘rta maxsus ta’lim vazirligi o‘zbekiston davlat jahon tillari universiteti

Vatanparvarlik tarbiyasi – bolalarni o‘z yurtiga, Vataniga muhabbatli va sadoqatli qilib tarbiyalashdir. Vatanparvarlik barcha kishilar, xalq, millatlar uchun bo‘lgan, asrlar davomida sayqallanib kelgan umuminsoniy tuyg‘u, ma’naviy qadriyatlardan biri. Tarixiy jihatdan vatanparvarlik kishilarning o‘z Vatanlari taqdiri bilan bog‘liq ijtimoiy rivojlanish, xalqlarning o‘zlari yashayotgan hududning daxlsizligi va mustaqilligi yo‘lidagi kurashi jarayonida takomillashib kelgan his – tuyg‘ulari jamlanmasi hamdir.

Vatanparvarlik tarbiyasi – Vatanni sevish, uni jon-dili bilan himoya qilish tuyg‘ularini ilk yoshligidan bola qulog‘iga quyish demakdir. Vatan hissi – muqaddas tuyg‘u. Bu tuyg‘u shu Vatanning egasi bo‘lmish xalqni bilishdan, uning qadriga yetishdan boshlanadi. Vatan va xalq egizak, mushtarak tushuncha. Birini his etish uchun ikkinchisini bilmoq lozim²³.

Shu yerda biz ushbu materialni tayyorlash jarayonida Tarbiya (Ota-onalar va murabbiylar uchun ensiklopediya) kitobi mualliflari tomonidan yo‘l qo‘yilgan ayrim kamchiliklarga ham e’tiborimizni qaratmoqchimiz. Jumladan, vatanparvarlik tarbiyasiga tavsif berishda mualliflar tomonidan quyidagi ibora ishlatilgan: “O‘zbekiston deganda o‘zbek xalqini, o‘zbek xalqi deganda O‘zbekistonni tushunmoq kerak”²⁴. O‘zbekistonda 130 dan ortiq millat va elatlar vakillari yagona oila bo‘lib, teng huquqlilik tamoyili asosida istiqomat qilayotgan bir vaqtda ushbu jumlaning ishlatishini o‘rinsiz, deb bilamiz.