O’zbekiston respublikasi oliy va o’rta maxsus ta`lim vazirligi buxoro davlat universiteti

Poykilogidr va gomeogidr o‘simliklar. Quruqlikdagi o‘simliklar suvsizlikka munosabatiga qarab 2 guruhga bo‘linadi: 1)poykilogidr; 2)gomeogidr. Birinchi guruhga bakteriyalar, suvo‘tlari, zamburug‘lar, lishayniklar, moxlar, paporotniksimonlar va ba’zi bir gulli o‘simliklar kiradi. Bu o‘simliklar o‘zlarining suv almashinuvini to‘liq boshqara olmaydilar va suvni saqlash uchun maxsus belgilarga ega emas. Hujayrasidagi suvning miqdori atmosferaning namlik darajasiga bog‘liq bo‘ladi. Atmosferada suv tanqisligi oshganda poykilogidr o‘simliklar tanasidagi barcha suvni sarflab anabioz holatiga o‘tadi. Anabioz holatiga o‘tgan bu o‘simliklarga juda past darajadagi havoning nisbiy namligi ham salbiy ta’sir etmaydi. Gerbariy holatida saqlangan Nostos sommune o‘simligi 107 yil o‘tgandan keyin qayta namlanganda unda hayotiy belgilarning qaytadan paydo bo‘lishi kuzatilgan(Cameron 1962).

Bu o‘simliklarda suvsizlikka nisbatan reaksiyasi bitta fazadan iborat. Suvning sarflanishi bilan nafas olish jadalligi va fotosintez ham pasayib boradi. P.A.Genkelning fikriga qaraganda, poykilogidr o‘simliklar makroergik energiya hisobidan sitoplazmaning gellanishini oshirish qobiliyatiga ega. Gomeogidr o‘simliklar guruhiga ko‘pgina gulli o‘simliklar, ochik urug‘lilar va paporotniksimonlar kiradi. Bular ma’lum darajada o‘zlarining suv almashinuvi jarayonini boshqara olish xususiyatiga ega. Shuningdek bu o‘simliklar qurg‘oqchilikka qarshi turish yoki uni chetlab o‘tish uchun anatomik, morfologik va fiziologik jihatdan moslashgan.