O’zbеkistоn rеspublikаsi оliy vа o’rtа mахsus tа’lim vаzirligi nizоmiy nоmidаgi tоshkеnt dаvlаt pеdаgоgikа univеrsitеti

Ёшларни тарбиялашда оила, маҳалла, таълим муассасаси ҳамкорлигини амалга ошириш механизми. Ўзаро ҳамкорлик ишларини бошқариш учун жойларда ўз таркибига маҳаллалар фаоллари, обрўли ота-оналардан, ўқув-тарбия муассасаларининг тажрибали ходимларидан, маҳалла ҳудудида жойлашган турли ташкилотларнинг вакилларидан иборат мувофиқлаштирувчи жамоатчилик кенгашлари тузилади. Жамоатчилик кенгашининг зиммасига юклатилган вазифалардан келиб чиқиб, унинг таркибида турли йўналишларда фаолият кўрсатадиган кичик ташаббускор гуруҳлар шакллантирилади.
Жамоатчилик кенгаши муайян муддатга мўлжалланган иш дастурига эга бўлади. Мазкур дастур маҳалла Фуқаролар йиғинининг йиғилишида расман тасдиқланиши зарур. Дастурда кўрсатилган тадбирлар режаси давра суҳбатлари, муайян мавзу ёки муаммога бағишланган кенгаш (мажлис)лар, анжуманлар, маҳалла аҳолисини бирлаштирувчи, уларни соғлом турмуш тарзига етакловчи кўрик-танловлар, мусобақалар, беллашувлар, учрашувлар ва турли саналарга бағишланган анжуман ёки тантаналардан ташкил топиши мумкин.
Белгиланган тартибга кўра жамоатчилик кенгаши ўз фаолияти тўғрисида маҳалла аҳлига ҳар чоракда бир маротаба ҳисобот бериб боради. Зарурат бўлганда ўқув-тарбия муассасалари, маҳалла фаоллари, маҳалла ҳудудида жойлашган ташкилот, корхона ва идораларнинг таълим-тарбия юзасидан олиб борилаётган ишлари тўғрисида ҳисоботларини тинглаб, уларга амалий ва назарий ёрдам кўрсатади.
Кенгаш маҳалла ҳудудида истиқомат қилувчи, ўз фарзандлари тарбиясига бефарқ ота-оналарга нисбатан давлат бошқарув идоралари, ҳуқуқни муҳофаза қилувчи органлар билан ҳамкорликда турли маъмурий чораларни қўллаш ҳуқуқига эга. Унинг ташаббуси билан долзарб мавзуларда фавқулодда маҳалла йиғинлари, ўқув-тарбия муассасаларининг педагогик кенгашлари ёки бошқа зарур тадбирлар ташкил этилиши мумкин. Кенгаш маҳалла ҳудудида ўзбек миллий тарбия анъаналарини тиклаш, турли маданий тадбирлар ўтказиш, болалар ва катталарнинг бўш вақтларини ташкил этиш борасидаги фаолиятни, шунингдек, мактаблар, ўйингоҳлар, маданият муассасалари, спорт иншоотлари, ўсмирлар клублари, мактабгача ва мактабдан ташқари муассасалар ишини мувофиқлаштиради.
Ўз ваколатига кўра Кенгаш маҳалла ҳудудида ташкил этилган тадбирлар мазмуни ва самарадорлигини таҳлил қилади, улар юзасидан услубий маслаҳатлар тайёрлаб, бу ҳақида оммавий ахборот воситаларида хабарлар бериб боради. Кенгаш ёш авлодни тарбиялашда маҳалла, мактаб ва оила ҳамкорлиги борасидаги масала ва муаммоларни маҳалла ҳудудидаги ўқув-тарбия муассасалари, ташкилот ва идоралари иши режалаштирилиши ва амалиёт дастурларига киритилишида улар ўртасида ўзаро ҳамжиҳатликка эришишни таъминлайди.