O’zbekiston respublikasi jismoniy tarbiya va sport vazirligi o’zbekiston davlat jismoniy tarbiya va sport universiteti eshkak eshish nazariyasi va uslubiyati chirchiq-2020 yil

O’quv-trenirovka yig’inlarini rejalashtirish. O’quv-trenirovka yig’inlari har haftada rejalashtiriladi va ikki yoki uch haftalik mikrosiklni o’z ichiga oladi. Mashg’ulot yuklanmalari kattaligi va yo’nalishi shunday rejalashtiriladiki, bunda ixtisoslashtirilgan mashg’ulot vazifalari soni ortishi, umumiy jismoniy tayyorgarlik va maxsus jismoniy tayyorgarlik yuklanmalari esa, musobaqalar boshlanish davrigacha pasayishi kerak. Bevosita musobaqa oldidan hammom kuni va bir-ikki kun dam olish kuni rejalashtirilib, musobaqadan bir kun oldin albatta joy, anjomlar va bo’lajak musobaqaning boshqa sharoitlari bilan tanishadilar.
Sportchilarning musobqalarda qatnashishdagi muvaffaqiyatlari mashg’ulot yuklanmalarining to’g’ri rejalashtirilishiga bog’liq. Reja tuzishda ancha murakkab bahslar ko’pincha musobaqalarning oxirgi kuniga to’g’ri kelishini hisobga olish zarur. O’quv – mashg’ulot yig’inlaridagi mashg’ulot yuklanmalari mazmuni musobaqa bosqichi davrlariga bog’liq holda har xil bo’ladi.
O’quv-trenirovka yig’inlari yakunini tahlil qilish. O’quv-trenirovka yig’inlari yakunini tahlil qilish ularni tayyorlash va o’tkazishdagi kamchaliklar, sabablar, shuningdek, ularni bartaraf qilish yo’llarini aniqlashda yordam beradi.
Tahlil quyidagi asosiy savollarga javob berish zarur:
Yig’in o’tkaziladigan joyning yig’in maqsad va vazifalariga mosligi;
Mos moddiy-texnika bazasining mavjudligi (mashg’ulot uchun zaruriy vositalar va sport anjomlarining mavjudligi hamda holati) va maishiy sharoitlar (joylashish va ovqailanish), ularning qo’yiladigan talablarga mosligi;
Yig’in qatnashchilarini chaqirishni o’z vaqtida rasmiylashtirish;
Yig’inga chaqirilgan va kelgan sportchilar soni, ularning yoshi va sport malakasi;
Yig’inga kela olmagan sportchilarning shaxsiy psixologik holati, ularning kelmaslik sabablari;
Yig’indagi o’quv guruhlari soni;
Murabbiylarning shahsiy tarkibi va ular shug’ullanadigan guruhlar hamda ularning tarkibi ko’rsatilgan holda o’zlari haqida qisqacha ma`lumot;
Yig’inda shifokor mavjudligi va tibbiy-pedagogik kuzatuvchilarni baholash;
Yig’in boshida va oxirida qatnashchilarning nazorat normativlarini topshirish yakunlari;
Yig’inda tezkor ko’rgazmali o’quv-axborot vositalarini (videoyozuvlar, SD va boshq.) qo’llash;
Sportchilarning individual mashg’ulot rejalarini bajarish natijalarini tekshirish;
Ish yakuni tahlil qilmay turib, jismoniy yuklanmalar hajmi trenirovka mashg’ulotlarining shiddatini tavsiflovchi ma`lumotlarni solishtirmay turib, sportchilar mahoratini takomillashtirishni rejalashtirish mumkin emas. Sifatli o’tkazilgan tahlil sportchilar tayyorgarligi va tarbiyasi holati, shuningdek, murabbiylarning o’zlari egallagan lavozimga loyiqligini xolisona aks ettiradi.