O’zbekiston respublikasi jismoniy tarbiya va sport vazirligi o’zbekiston davlat jismoniy tarbiya va sport universiteti eshkak eshish nazariyasi va uslubiyati chirchiq-2020 yil

Burilishni bajarish. Ichki bort tomonga burishda sportchi qayiq bortidan uzoqroq masofadan suvni ilishni bajaradi. Olib o’tishda esa eshkak yuzasini deyarli qayiq tagidan olib o’tadi. Tashqi bort tomonga burishda eshkak yuzasi bilan suvni ilish qayiq borti yonginasida bajariladi. Olib o’tish to’g’ri boshqarilishsiz, eshkak yuzasini bortdan uzoqlashtirish bilan bajariladi.
Ikkitalik kanoeda tumshuqdagi eshkak eshuvchi tomonga va asosdagi eshkak eshuvchi tomonga burilishlar farqlanadi. Tumshuqdagi eshkak eshuvchi tomonga burilishda ikkala sportchi ham suvni ilishni o’tkir burchak ostida, qayiq bortidan uzoqroqdan jajaradi. Tumshuqdagi eshkak eshuvchi qayiq tumshug’ini “tortishga”, asosdagi eshkak eshuvchi esa asosni “tortishga” harakat qiladi.
Agar burilish asosdagi eshkak eshuvchi tomonga bajarilsa oldinda turgan sportchi suvni ilishni qayiq borti yonginasidan bajaradi va barcha kuchlanishni bortdan tashqi tomonga yo’naltiradi. Asosdagi sportchi suvni bort yonginasidan iladi va to’g’ri boshqarilishni bajaradi.
Startdan chiqish va marraga kelish texnikasi. Startda “Diqqat” komandasi bo’yicha sportchi quyidagi holatni egallaydi: pastki qo’l oldinga maksimal cho’zilgan, yuqoridagi qo’l tirsak bo’g’imidan bukilgan va qo’l panjasi bosh ustida holatgacha ortga tortilgan. Gavda tashqi bort tomonga ko’krakdan burilgan va biroz egilgan. Eshkak suv yuzasida va suvga kirish burchagi taxminan 60˚.
Birinchi eshish to’liq harakat amplitudasi bilan amalga oshiriladi. Keyin 5-6 ta eshish qisqartirilgan amplituda bilan maksimal tempda bajariladi. Qayiq poyga tezligiga yetgandan keyin olib o’tish uzunligi doimiy oshirib boriladi va sportchi dastlabki harakat amplitudasiga o’tadi.
Ikkitalik kanoeda sportchilarning start holati huddi bittalik kanoedagi sportchilarniki kabi bo’ladi. Ikkitalik kanoeda ikkala eshkak eshuvchining ishi birinchi start eshishidan boshlab harakatlar mosligi maksimal darajada bo’lishi zarur. Aks holda qayiq kursdan og’ishni boshlaydi.
Marra tezlanishida eshish tempi oshirilib boriladi va olib o’tish kuchaytiriladi. Eshkak eshuvchilar eshkakni o’tkazish vaqtini qisqartiradi. Eshish tempi gavda harakati evaziga oshiriladi.