O‘zbekiston Respublikasi Hukumatining o‘z kuchini yo‘qotgan qarorlari ro‘yxati

IV. Xorijiy fuqarolar tomonidan ov qilish tartibi

66. Yovvoyi hayvonlarni ovlash uchun O‘zbekiston Respublikasiga keladigan xorijiy fuqarolarga foydalanish huquqi Tabiatni muhofaza qilish davlat qo‘mitasining ruxsatnomasi asosida quyidagi tartibda beriladi:

xorijiy fuqarolarning ov qilish va baliq ovlash uchun O‘zbekiston Respublikasiga kelishi, bu yerda bo‘lishi va O‘zbekiston Respublikasidan ketishi qonun hujjatlarida belgilangan tartibda amalga oshiriladi;

ov qilish uchun buyurtmanoma, shuningdek hayvonot dunyosidan foydalanish uchun to‘lov to‘langanligi to‘g‘risidagi hujjat xorijiy fuqarolarga ruxsatnoma berish uchun asos hisoblanadi, xorijiy fuqaroning o‘zi yoki uning manfaatlarini ifodalovchi shaxs tomonidan jo‘natiladigan mazkur buyurtmanomada ovlanadigan hayvonlar turlari va ov qilish muddatlari ko‘rsatiladi;

ovlash uchun ov qurolidan foydalanuvchi xorijiy fuqaro qurollar va ularga o‘q-dorilarni respublikaga olib kirish uchun Ichki ishlar vazirligining ruxsatnomasini olishi zarur.

67. O‘zbekiston Respublikasining Qizil kitobiga kiritilgan hayvonot dunyosi obyektlarining ayrim turlarini ovlash uchun O‘zbekiston Respublikasiga keladigan xorijiy fuqarolarga foydalanish huquqi qonun hujjatlarida belgilangan tartibda O‘zbekiston Respublikasi Vazirlar Mahkamasining qarori asosida beriladi.

68. Xorijiy fuqarolarning ov qilishi Tabiatni muhofaza qilish davlat qo‘mitasi nazorati ostida amalga oshiriladi.

69. Hayvonot dunyosidan foydalanish uchun to‘lovlar ushbu Nizomga 1-ilovaga muvofiq undiriladi. Ruxsatnomalar mazkur to‘lovlar to‘langandan keyin beriladi. Yovvoyi hayvonlarni ovlaganlik uchun to‘lovlardan tushgan mablag‘lar belgilangan tartibda sarflanadi.

70. Ovlash vaqtida yaralangan hayvonlar ovlangan hayvonlarga tenglashtiriladi.

71. Mavsumdan qat’i nazar, xorijiy fuqarolar ishtirokida ovchilik tadbirlari o‘tkazilganda tadbir davomida haftaning barcha kunlarida ov qilishga ruxsat beriladi.

72. Ovlangan hayvonlarni, ularning qismlarini, o‘ljalarini va shu kabilarni O‘zbekiston Respublikasidan olib chiqib ketishga ruxsatnoma hayvonot dunyosidan foydalanishga ruxsatnoma hamda tabiatni muhofaza qilish bo‘yicha vakolatli davlat inspektori va ovchi tomonidan imzolangan ovlangan hayvonlar to‘g‘risidagi dalolatnoma asosida beriladi.