O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Mazkur holatni Oʻzbekiston Respublikasi jinoyat-protsessual qonunchiligi asosida tahlil qilgan holda huquqiy baho bering?
XXXI BOB. JINOYAT SUD ISHLARINI YURITISH SOHASIDAGI XALQARO HAMKORLIK
(Muallif – yuridik fanlar doktori, dotsent A.Mirzayev)


Annotatsiya: mazkur mavzuning oʻquvchilar tomonidan oʻzlashtirilishi natijasida jinoyat sud ishlarini yuritish sohasidagi xalqaro hamkorlik tushunchasi, mohiyati va vazifalari, jinoyat ishlari yuritish sohasidagi xalqaro hamkorlikni amalga oshirishga vakolatli boʻlgan organlar va mansabdor shaxslar, xalqaro hamkorlik shakllari va protsessual tartibi, xalqaro jinoyat huquqiy munosabatlarni, jumladan, xorijiy davlatning shaxsni ushlab berish toʻgʻrisidagi soʻrovi, ushlab berilgan shaxsning javobgarlik doirasi, xorijiy davlatga shaxsni ushlab berishni rad etish kabi munosabatlarni tartibga solish haqida bilimlarga ega boʻlinadi.

31.1. Jinoyat sud ishlarini yuritish sohasidagi xalqaro hamkorlik tushunchasi, mohiyati va vazifalari

Jinoyat ishi yuritish boʻyicha huquqiy yordam – bu soʻrov yuboruvchi davlatning vakolatli organlari faoliyatini tartibga soluvchi milliy qonunchilikka asoslangan, xalqaro shartnomalarga yoki oʻzarolik prinsipiga muvofiq keladigan, soʻrov yuboruvchi davlatning sudi va boshqa vakolatli organlar tomonidan yuborilgan, soʻrov yuborilayotgan davlatning hududida soʻrov yuboruvchi davlatdagi tergov va sud ishi yuritilayotgan jinoyat ishi yuzasidan dalillar toʻplash maqsadida protsessual harakatlar va tezkor-qidiruv tadbirlari oʻtkazish toʻgʻrisidagi soʻrov (topshiriqlari)ni ijro etishdir.

Jinoyat sud ishlarini yuritish sohasida xalqaro hamkorlikning huquqiy asosi boʻlib, Oʻzbekiston Respbulikasining ikki tomonlama va koʻp tomonlama shartnomalari, konvensiya va kelishuvlari xizmat qiladi.
Jinoyat ishlari boʻyicha xalqaro huquqiy yordamning boshqa hamkorlik shakllaridan quyidagi bir necha farqli jihatlarini e’tirof etish mumkin:
– huquqiy yordam soʻrov yuboruvchi davlat vakolatlari organining soʻrovi (topshirigʻi) asosida koʻrsatiladi;
– u asosan jinoyat ishi boʻyicha dalil yoki zarur axborot olish maqsadida tergov-protsessual va tezkor qidiruv tadbirlarini oʻtkazishga qaratilgan boʻladi;
– soʻrov yuborish orqali davlat soʻrov yuborilayotgan davlatga oʻz vakolatlarining bir qismini beradi, ya’ni xorijiy davlat bu davlat uchun muayyan bir harakatlarini oʻz qonunchiligi asosida amalga oshiradi, bu davlat esa mazkur harakatlar natijasida olingan dalillarni e’tirof etadi.