O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Mavzu boʻyicha xulosalar

Sud muhokamasining umumiy shartlari, ya’ni sud muhokamasining bevositaligi, ogʻzakiligi va oshkoraligi, sudlovga tegishlilik, sud tarkibining oʻzgarmasligi, sud muhokamasi ishtirokchilarining tengligini ta’minlash va ularning protsessual holatini kafolatlash, sud muhokamasi doirasining qatʻiyligi; jinoyat ishini toʻxtatish va tugatish, sud majlisining tartibi va sud majlisining bayonnomasi toʻgʻrisida tushunchalar shakllanishi lozim.

Muammoli savollar va kazuslar

1. Sud muhokamasining umumiy shartlari deganda nimani tushunasiz? Uning ahamiyati nimalarda namoyon boʻladi?
2. Sud muhokamasi doirasi deganda nimani tushunasiz? JPKning mazkur normalariga kiritilgan soʻnggi oʻzgartishlarning mazmun-mohiyati va ahamiyatini tushuntiring.
3. Surishtiruvning, dastlabki tergovning toʻliq emasligini yoki jinoyat-protsessual qonuni normalarining jiddiy buzilishlarini bartaraf etish tartibini tushuntiring.


Kazus
Oʻzbekiston Respublikasi JKning 210-moddasi 3-qismida nazarda tutilgan jinoyatni sodir qilgan sudlanuvchi D.Shamshiyevga oid jinoyat ishini birinchi instansiya sudi tariqasida Jinoyat ishlari boʻyicha Toshkent shahar sudi sudyasi M.Klichev tomonidan mazmunan koʻrib chiqayotgan vaqtda oxirgi soʻzida jinoyat ish uchun muhim ahamiyatga molik yangi ma’lumotlarni maʻlum qildi.
Jinoyat ishlari boʻyicha Toshkent shahar sudi sudyasi M.Klichev sudlanuvchi D.Shamshiyevga oid jinoyat ishi yuzasidan aniqlangan yuqoridagi holatlar hukmning qonuniy, asosli va adolatliligiga ta’sir qilmasligini aytib, buning sababini sud tergovi allaqachon tugab ketganligi bilan izohladi.
Jinoyat ishi boʻyicha davlat ayblovchisi sifatida qatnashayotgan O.Berdimurodov jinoyat ishi yuzasidan sud tergovini yangidan boshlash toʻgʻrisida fikr bildirdi.
Mazkur holatni Oʻzbekiston Respublikasi jinoyat-protsessual qonunchiligi asosida tahlil qilgan holda huquqiy baho bering.
XXV BOB. SUD MAJLISINING TAYYORLOV QISMI. SUD TERGOVI
(Muallif – yuridik fanlar doktori, professor G.Tulaganova)


Annotatsiya: mazkur mavzuni oʻzlashtirish orqali sud majlisining tayyorlov qismi, sudda soʻroq qilish tartibi, unda kriminalistika metodikalarini qoʻllash, sud tergovida yozma dalillarni, ekspertlarning xulosalarini va tergov harakatlari bayonnomalarini tekshirish, tergov harakatlarini oʻtkazish metodikalari haqida bilimlar egallanadi.