O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

23.3. Dastlabki tergovdagi texnik yoʻsindagi kamchiliklarni bartaraf etish uchun ishni prokurorga yuborish

Surishtiruv va dastlabki tergov jarayonida yoʻl qoʻyilgan texnik yoʻsindagi kamchiliklar, shu jumladan, yozuvdagi xatolar, harfiy xatolar yoki arifmetik xatolar aniqlangan taqdirda, sudya ularni bartaraf etish uchun ishni prokurorga yuboradi (JPKning 401¹-moddasi).

Texnik yoʻsindagi xatolar bartaraf etilganidan va ish prokuror tomonidan qaytarilganidan keyin besh sutka ichida sud jinoyat protsessual qonunchilikning umumiy qoidalariga koʻra jinoyat ishini sudda koʻrish uchun tayinlash bilan bogʻliq masalalarni hal etadi.

23.4. Protsess ishtirokchilarini jinoyat ishi materiallari bilan tanishtirish

Sudya jinoyat ishini sudda koʻrish uchun tayinlangandan soʻng protsessual ishtirokchilarni jinoyat ish materiallari bilan tanishishi uchun barcha sharoitlarni yaratib beradi va ularga ish materiallaridan nusxa olishlariga ruxsat beradi.

Agar sudda jinoyat ishi materiallari bilan bir necha ishtirokchi tanishishi lozim boʻlsa, ularning navbati belgilanadi. Qamoqda saqlanayotgan sudlanuvchi uchun jinoyat ishi materiallari bilan tanishish joyi sudya tomonidan qayd etiladi. Aksariyat hollarda u qamoqda saqlanayotgan muassasa binosida yoki sud binosida ish materiallari bilan tanishtiriladi.

23.5. Sud majlisida jinoyat ishini muhokama qilish muddati

Ayblov xulosasining nusxasi sud majlisi boshlanishidan kamida uch kun avval topshirilishi lozim.

Agar sud jinoyat ishini koʻrishni keyinga qoldiradigan yoki ish boʻyicha ishtirokchilar roʻyxati oʻzgaradigan boʻlsa, sudya tomonidan ajrim chiqariladi va bu haqida tomonlarga ma’lum qilinadi.

JPKning 405-moddasiga binoan jinoyat ishini sud muhokamasiga tayinlash toʻgʻrisidagi qaror chiqarilgan vaqtdan boshlab, koʻpi bilan oʻn sutkada sud ishini koʻrishni boshlashi kerak. Jinoyat ishini koʻrib chiqish boshlangan vaqtdan e’tiboran uzogʻi bilan ikki oy ichida sud uni mazmunan hal etishni tugallashi lozim.