O‘quv qo‘llanma 5111800 Maktabgacha ta’lim bakalavriat ta’lim yo‘nalishi talabalari uchun Toshkent 2019 Annotatsiya

«Gullagan shaftolining novdasi» ni yasash
Mashg‘ulot vazifalari: bolalarda qog‘ozni bir necha marotaba buklab qirqish asosida gul barglarini hosil qilish‚ gul barglarini novdaga yelimlab, chiroyli gullagan shaftoli novdasini yasash malakalarini o‘stirish.
Mashg‘ulotga tayyorgarlik.
Bolalar bilan hovli yoki ko‘chadagi gullagan shaftoli daraxtini kuzatish. Gullarning tuzilishiga, rangiga, novdada joylashishiga bolalarni e’tiborlarini jalb qilish.
Mashg‘ulotning borishi:
Tarbiyachi: bolajonlar, mana o‘lkamizda bahor fasli. Bahorda tabiatda juda katta o‘zgarishlar ro‘y beradi. Shoirlarimiz aytganidek:
Keldi bahor, gul bahor‚
Erib bitdi, oppoq qor.
Uchib keldi, qushlarjon
Daraxtlar taqdi marjon.
Ha, «daraxtlar taqdi marjon». Shoirlarimiz, daraxt kurtaklarini marjonga o‘xshatishyapti, bir oz vaqt o‘tgandan so‘ng, daraxtimiz chiroyli bo‘lib, chaman - chaman gullaydi. Keling, bugungi mashg‘ulotda, xuddi shunday gullagan daraxtlarning novdasini biz ham tayyorlashni o‘rganamiz. Biz sizlar bilan gullagan shaftoli novdasini yasaymiz. Kerakli ashyolar oldingizdagi stolga qo‘yilgan. Novdani oldimizga qo‘yib, pushti rangdagi g‘ijim qog‘ozdan kvadrat shaklini qirqib olamiz. Uni ikkiga, so‘ng to‘rtga buklaymiz, natijada kichik kvadratchalar hosil bo‘ladi. Buklangan kvadratchaning bir uchini ushlab turib, ochiq uchlarini qaychi bilan yarim doira tarzida qirqib olamiz, buklangan kog‘ozni ochamiz. O‘rtasiga barmog‘imizni qo‘yib tursak gul bargining cheti qayrilib qoladi. Chuqur joyining orqasiga ozgina yelim surtiladi. So‘ngra novdaga yelimlanadi. Gullarni yelimlashdan oldin tarbiyachi bolalarga shaftoli guli novdada qanday joylashganligini eslatib, tabiiy holiga o‘xshatib, ketma-ket yelimlash kerakligi uqtiriladi. Gul yaprog‘ini qirqa olmagan bola­larga yakka holda yordam ko‘rsatiladi. Mashg‘ulot davomida bolalarning yaxshi ishlari rag‘batlantirilib boriladi.
Tayyor novdalarni solib qo‘yish uchun xar bir stolga, bolalarning o‘zlari yasagan guldonlar qo‘yib chiqiladi. Bolalar gullagan novdani guldonlarga solib qo‘yadilar.
Tarbiyachi: bolalar‚ qarang, siz yasagan gullab turgan shaftoli novdachalaringiz xonamizni yana ham chiroyli qilib yubordi.
Bolalarni o‘z ishlari natijasidan zavqlanishga o‘rgatib boriladi. Shu tariqa mashg‘ulot yakunlanadi.