Олмалиқ филиали “кончилик иши ва металлургия” факультети

1.Умумий холатлар.
1.1. Курс лойихасини бажаришдан мақсад.
“Фойдали қазилма конларини очиқ усулда қазиб олиш технологияси” курси бўйича курс лойихасини бажаришдан мақсад, талабаларнинг маьруза машғулотларида тинглаган назарий билимларини мустаҳкамлаш, ҳамда уларга содда кон-геологик шароитларда муҳандис техник масалаларини мустақил ечишда янги фан ютуқларини қўллай олишни ўргатишдир.
Лойиҳалаш, халқ хўжалиги, кончилик таълими ва кончилик корхоналарининг замонавий ютуқлари ва илғор кон корхоналарининг тажрибаларини ҳисобга олган ҳолда бажарилиши керак.
Курс лойиҳасини бажаришда компьютер технологияларидан фойдаланиш мақсадга мувофиқ.
Курс лойиҳасида талабалар томонидан ишлаб чиқариш амалиёти вақтида ёки ўқув жараёнида кафедрада бажарилган илмий тадқиқот ишларининг тамомлаган қисмларидан фойдаланиш тавсия этилади.
Курс лойиҳасини бажаришда фойдали қазилма конларини очиқ усулда қазиб олишда техника ва технологияларини қўллаш қоидалари ҳамда кончилик саноати соҳасида кон ишларини олиб боришнинг намунавий схемаларини ҳисобга олиш лозим.
1.2.Курс лойиҳасини ташкил этиш ва унинг бажарилиш тартиби.
Ўқув режасига мувофиқ курс лойиҳаси Олий таьлим бакалавриати 5311600 – “Кончилик иши” ва 5111000-“Касб таълими (Кончилик иши)” йўналишлари талабалари томонидан 4-курс 8 семестрида бажарилади. Курс лойиҳаси учун топшириқ ва курс лойиҳаси таркиби “Кончилик иши” кафедраси профессор-ўқитувчилари томонидан ишлаб чиқилади ва кафедрада тасдиқланади.
Курс лойиҳаси ҳар бир талабага “Кончилик иши” кафедраси томонидан бириктирилган профессор-ўқитувчи раҳбарлигида, берилган топшириқ бланкаси асосида бажарилади. Курс лойиҳасини бажариш учун маслаҳат дарсларини олиб бориш соатлари “Кончилик иши” кафедраси мудири томонидан тасдиқланган режа асосида белгиланган тартибда амалга оширилади. Курс лойиҳаси бўйича маслаҳат дарсларига ҳар бир талаба қатнашиши шарт. Бажарилган (ишлаб чиқилган) курс лойиҳаси лойиҳа рахбари томонидан текширилади ва шундан сўнг кафедра томонидан тузилган комиссияга ҳимоя қилишга рухсат этилади.
Ўқув жараёнининг амалиёт қисмига мувофиқ “Кончилик иши”ва “Касб таълими” йўналишлари талабалари минерал хомашёларни очиқ усулда қазиб олувчи етакчи кон корхоналарида амалиёт ишларини ўтайдилар, шунинг учун ҳам улар амалиёт ишларида тўплаган маьлумотлари асосида аниқ шароитлар учун курс лойиҳасини бажарашлари тавсия этилади.