Oliy va o’rta maxsus ta’lim vazirligi namangan davlat universiteti

Akmeologiyaning ta’lim jihati – umumiy, professional va uzluksiz ta’lim tizimida bilim va ko‘nikmalarni aniqlashga hamda oshirishga yo‘naltiriladi.
Akmeshaxs – akmeologiyaning asosiy predmeti bo‘lib, uning mazmun-mohiyati – insonning har bir kasb-hunarni ilm-bilim orqali chuqur egallashi, uning jamiyat rivoji, millat ravnaqi, turmush farovonligi hamda ijtimoiy taraqqiyotning iqtisodiy, siyosiy, ma’naviy-huquqiy jihatlariga ijobiy ta’sirini kuchaytirishga xizmat qilishini chuqur anglashi, o‘z ijodiy faoliyatini, kasb-hunar sohasidagi burch va mas’uliyatini ado etishga sarflash maqsadida mukammallik va kamolotga erishishi jihatlarini fanlar bilan uyg‘unlikda o‘rganishdan iborat bo‘lib, u insonning ijtimoiy-iqtisodiy, ma’naviy dunyosida yuksakroq cho‘qqilarga, kasbiy kamolotda mukammallik bosqichiga erishish muammolarini o‘rganadi. “Akme” – insonning ko‘p o‘lchamli yuksalish holati, uning hayotini vaqt o‘lchami bo‘yicha ahamiyatli bosqichini qamrab olgan holda, uning jamiyatdagi fuqaroligi, ma’lum faoliyat doirasidagi mutaxassisligi, boy yoki kamtarona yashash turmush tarzi, oilaviy holati, ota yoki ona ekanligi bilan ajralib turadi.
Antimanipulyativ xulq-atvor – birovlarning shaxsiy qadr-qiymatini, huquqini poymol etmasdan, o‘z qadrini, huquqini bilib unga rioya etish va talab qila olishdan iboratdir. Buni “assertiv” xulq deyiladi, chunki qachonki inson o‘z xatti-harakatlarining chegarasi, meyyorini bilib unga rioya etsa, birovlarning qadrini, huquqini hurmat qilib, odob doirasida uni joyiga qo‘ya oladi.
Barkamol inson – mustaqil va hur fikrli, o‘zining qadr-qimmatini anglaydigan, irodasi baquvvat, iymoni butun, hayotda aniq maqsadga ega, aqli, tafakkuri, mehnati, mas’uliyat bilan yashovchi, ongli, eski tushunchalar va aqidalardan xalos bo‘lgan inson.
Bibliometriya (yunoncha biblion – kitob va metron ~ o‘lchov, metreo – o‘lchayman) - XX asrning 60-yillarida yuzaga kelgan ilmiy faoliyatda hujjatlar oqimining miqdorini tadqiq etuvchi yangi ilmiy yo‘nalish.