Oliy va o‘rta махsus та’lim vazirligi huzuridagi "MA’naviyat va ma’rifat" markazi

ОНАМ КИПРИГИГА АРЗИМАС ДУНЁ

Сен мени соғиндинг, мен эсламадим,

Бошқага аталди меҳрли хатим,
Ўзинг бахтимдирсан, ўзинг омадим,
Музлаган дилимни ўйгим келяпти.
Она, кўксингга бош қўйгим келяпти.

Сабримни синашди сабрдошларим,

Қадримни билмади қаламқошларим,
Бўғзимдан ўтмайин қолди ошларим,
Барини эртакка йўйгим келяпти,
Она, кўксингга бош қўйгим келяпти.

Кимга орзу, кимга бир ҳавас дунё,

Кимга узун, кимга бир нафас дунё,
Битта кипригингга арзимас дунё,
Кулчаларинг ҳидлаб тўйгим келяпти,
Она, кўксингга бош қўйгим келяпти.

Яхшилик қилгандан миннатни кўрдим,

Савоб-у гуноҳни, суннатни кўрдим,
Сенинг нигоҳингда жаннатни кўрдим,
Суйсам, фақат сени суйгим келяпти,
Она, кўксингга бош қўйгим келяпти.

Дунёда дунёдан ортиғим ўзинг,

Энг буюк неъматим, тортиғим ўзинг,
Боқий муҳаббатим, борлиғим ўзинг,
Меҳрингни кучлироқ туйгим келяпти,
Она, кўксингга бош қўйгим келяпти.

Сенинг кўксинг каби илиқ жой қайда?

Сенинг юзинг каби тўлин ой қайда?
Сен борсан, мен каби тенгсиз бой қайда?
Шодликни бир жойга уйгим келяпти,
Она, кўксингга бош қўйгим келяпти.

Фаришта юзингни бир силаб қўяй,

Оёғинг оғриса, уқалаб қўяй,
Қалбимга меҳрдан ўт қалаб қўяй,
Алла айт, онажон, уйқум келяпти,
Она, кўксингга бош қўйгим келяпти.

Чақирсанг ёнингга чопаман, она,

Бахтимни пойингдан топаман, она,
Юрган йўлларингни ўпаман, она,
Суйсам, фақат сени суйгим келяпти,
Она, кўксингга бош қўйгим келяпти.
Фақат оналаримизгина бизга ўз меҳр-муҳаббатлари билан бирга юракларини ҳам беришга тайёр бўлишади. Онанинг овози жаранглаган уй борки, дунёдаги энг файзли хонадон ҳисобланади. Эътибор берсак, оналаргина косасидаги митти гўштигача фарзандига илинади. Хўш, бебош фарзандлар бу дунёда оналардан, оталардан кўра меҳрибонроқ инсонларни топа олишадими: Йўқ, асло...