Нефть ва газни қайта ишлаш жараёнлари ва ускуналари Ўзбекистон Республикаси Олий ва ўрта махсус таълим вазирлиги олий ўқув юртлари бакалавриатининг «Нефть ва нефть-газни қайта ишлаш технологияси»

Колоннали кристаллизаторлар. Узлуксиз контактли кристалланиш жараёнини амалга оширишда колонна русумидаги ускуналар ҳам кенг ишлатилади. Бундай ускуналарда кристалланаётган аралашма ва совитувчи агент қарама-қарши йўналишда ҳаракат қилишади. Бундай кристаллизаторлар суюқликларни экстракция қилишга мўлжалланган ускуналарга ўхшайди. 17.8 ва 17.9-расмларда роторли ва эритма сочиб бериладиган кристаллизаторларнинг схемалари келтирилган. Роторли - колоннали ускунада кристалланиш жараёни дисперс фазада амалга оширилади. Бунда кристалланишга учраётган аралашма совитувчи агентга нисбатан анча кичик зичликка эга. Ускунанинг вали 2 га парракли аралаштиргичлар бириктирилган. Фазаларнинг ўқ бўйлаб аралашишини камайтириш учун ускуна баландлиги бўйича ҳалқасимон тўсиқлар 4 ёрдамида бир неча секцияларга ажратилган. Кристаллизаторнинг пастки қисмида эмульгациялаш 8 ва тиндириш 9 секциялари мавжуд, ускунанинг юқориги қисмида эса кристалли суспензия учун йиғгич 6 жойлаштирилган.



17.8-расм. Роторли-колоннали кристаллизатор схемаси:
1-ускуна қобиғи; 2-вал; 3-аралаштиргич; 4-секция ҳосил қилувчи тўсиқлар; 5-куракчали аралаштиргич; 6-суспензия қабул қилгич; 7-элаксимон тўсиқ; 8-эмульгациялаш секцияси; 9-тиндириш секцияси: I-дастлабки аралашма; II-дастлабки совитувчи агент; III-кристалли суспензия; IV-ишлатилган совитувчи агент.

Дастлабки аралашма I ускунанинг пастки қисмига берилади ва майда заррачаларга ажралган ҳолатда юқорига кўтарилади. Совитувчи агент II юқориги секцияларнинг бирига берилади ва кристалланаётган аралашмага нисбатан қарама-қарши йўналишда ҳаракат қилади. Аралаштиргичи бўлмаган энг юқори секцияда кристалли суспензия III совитувчи агентдан ажралиб йиғгич 6 га тушади, ундан сўнг фильтрлашга юборилади.

17.9-расмда кўрсатилган колоннали ускунада кристалланиш жараёни яхлит фазада юз беради. Дастлабки эритма I ускунага юқориги коллектор 4 орқали берилади, кристалли эритмага нисбатан анча енгил бўлган совитувчи агент II эса кристаллизаторга пастки коллектор 5 ёрдамида юборилади. Совитувчи агент қия найча (сопло) 6 орқали ўтиб, майда заррачаларга ажралади ва кристалланиш ҳолатида пастга тушаётган аралашмага нисбатан қарама-қарши ҳаракат қилади. Қуйилтириш секцияси 2 да она эритма тиндирилади. Қуйилтирилган суспензия III пульсация қиладиган клапан билан жиҳозланган пастки штуцер орқали ускунадан ташқарига чиқарилади, тиндирилган она эритма IV эса қуйилтириш секциясининг юқориги қисмидан ташқарига узатилади. Ишлатилган совитувчи агентнинг томчилари тиндириш секцияси 3 да йиғилади, у ерда томчилар бирлашиб яхлит оқим V ҳосил қилади ва ускунадан ташқарига чиқарилади.





17.9-расм. Аралашма сочиб берилувчи кристаллизатор схемаси:
1-қарама-қарши йўналишдаги контактли секция; 2-суспензияни қуйиқлаштирувчи секция; 3-совитувчи агентни тиндириш секцияси; 4-дастлабки аралашманинг кириши учун коллектор; 5-совитувчи агентнинг кириши учун коллектор; 6-қия найча; I-дастлабки аралашма; II-дастлабки совитувчи агент; III-қуйиқлашган суспензия; IV-тиндирилган она эритма; V-ишлатилган совитувчи агент.