N. K. Jamalov mehnat huquqi

Mehnat kodeksining 270-moddasiga ko’ra sudga yoki mehnat nizolari komissiyasiga murojaat etish uchun quyidagi muddatlar belgilanadi:

- ishga tiklash nizolari bo’yicha - xodimga u bilan mehnat shart­nomasi bekor qilinganligi haqidagi buyruqning nusxasi berilgan kundan boshlab bir oy;

- xodim tomonidan ish beruvchiga yetkazilgan moddiy zararni to’lash haqidagi nizolar bo’yicha - zarar yetkazilganligi ish beruvchiga ma’lum bo’lgan kundan boshlab bir yil;

- boshqa mehnat nizolari bo’yicha - xodim o’z huquqi buzilganli­gini bilgan yoki bilishi lozim bo’lgan kundan boshlab uch oy.

Ushbu moddada belgilangan muddatlar uzrli sabablarga ko’ra o’tkazib yuborilgan taqdirda, bu muddatlar sud yoki mehnat nizolari komissiyasi tomonidan qayta tiklanishi mumkin.

Xodimning sog’lig’iga yetkazilgan zararni qoplashga doir nizolar bo’yicha sudga murojaat qilish uchun muddat belgilanmaydi. SHuningdek, fuqarolik qonunchiligining umumiy talablariga ko’ra xodimga yetkazilgan ma’naviy zarar uchun (shaxsiy nomulkiy huquqlari buzi­lishi, sha’ni va qadr-qimmatiga ziyon yetkazilishi) tovon to’latish haqidagi da’vo talablariga nisbatan ham da’vo muddati qo’llanilmaydi.

Da’vo muddati o’tishning boshlanishi, to’xtatib turilishi, uzi­lib qolishi, uzrli sabab bilan o’tib ketgan da’vo muddatini qayta tiklash va huquqlarni himoya yetilishiga oid fuqarolik qonunchiligi­da nazarda tutilgan norma va qoidalar mehnat nizolariga ham tatbiqqilinadi.

Mehnat nizolarining sudlovliligi fuqarolik protsessual qonunchiligiga ko’ra aniqlanadi.

Yashash joyi noma’lum bo’lgan javobgarga nisbatan da’volar uning mol-mulki turgan joyda yoki uning so’nggi yashagan joyida qo’zg’atilishi mumkin.

O’zbekiston Respublikasida yashash joyiga ega bo’lmagan javob­garga nisbatan da’volar O’zbekiston Respublikasida uning mol-mulki turgan joyda yoki ma’lum bo’lgan so’nggi yashash joyida qo’zg’atilishi mumkin.

Mehnat nizosi yuzasidan sudga murojaat qilganda xodimlar sud xarajatlarini to’lashdan ozod etiladilar. Sud xarajatlari davlat boji va ishni ko’rish bilan bog’liq chiqimlardan iboratdir.

Arizalar javobgar doimiy yashab turgan yoki doimiy mashg’ul bo’lgan joydagi sudga beriladi. Tashkilotlarga nisbatan ariza ular­ning organlari joylashgan hududdagi sudga beriladi.