N. Hakimov, E. Abdullayev, F. Halimov, A. Xamidova umurtqasizlar zoologiyasidan amaliy mashg’ulotlar

Ishni bajarish

1-ish. Qoramol va cho’chqa solityorlarining strobilalaridan tayyorlangan formalinli silindr idishlaridagi eksponatlarni qo’l lupasi yordamida kuzating. Ular tanasining oldingi, o’rta va keyingi qismlaridagi proglottidlarning shakli va o’lchamlariga e’tibor bering.

2-ish. Qoramol va cho’chqa solityorlarining skoleksining achchiqtoshli karmin bilan bo’yalgan mikropreparatlarini mikroskopning kichik obyektivida kuzatib, undagi so’rg’ichlarning shakli, joylashishi, aylanma muskullari, xartumchadagi xitinli ilmoqchalarni ko’ring.

3-ish. Qoramol va cho’chqa solityorlarining achchiqtoshli karmin bilan bo’yalgan germafrodit bo’g’imlarini tuzilishini mikroskopning kichik obyektivida batafsil kuzating. Ulardagi ichki organlarga, jinsiy sistema bo’limlariga e’tibor bering.

4-ish. Qoramol va cho’chqa solityorlarining achchiqtoshli karmin bilan bo’yalgan yetilgan proglottidlarni mikroskopning kichik obyektivida kuzating. Ushbu proglottidlardagi bachadonlarning umumiy shakli, yon shoxchalari va ularning soni, bachadonning asosiy tanasi hamda uning shoxchalari ichidagi urug’langan tuxumlarni joylashishi, proglottidlarning yon tomonida jinsiy kloakani ochiq yoki yopiqligiga, shuningdek yetilgan proglottidlarning bo’yi va eniga e’tibor bering.

5-ish. Qoramol va cho’chqa solityorlarining sistiserklaridan tayyorlangan bo’yalgan mikropreparatlarini mikroskopning kichik obyektivida kuzating. Ulardagi so’rg’ichlarga va cho’chqa solityori sistiserkidagi xartumchaning tuzilishi hamda xitinli ilmoqchalarni joylashishiga e’tibor bering.

6-ish. Qoramol va cho’chqa solityorlarining skolekslari, germafrodit va yetilgan proglottidlarini hamda sistiserklarini rasmlarini chizing.