Mustaqillik yillarida qoraqalpog`iston davlatchiligi taraqqiyoti

Tashqi iqtisodiy aloqalar

Respublikada istiqlol yillarida tashqi iqtisodiy aloqalarga ham katta e'tibor berildi. Masalan, 1996yildagi tashqi savdo oboroti 228,4 mln. AQSH dollarini tashkil etdi, bu 1995-yildagiga nisbatan 3,7 marta ko`p bo`ldi.

1996-yilda Qoraqalpog`iston Respublikasining tashqi savdodagi asosiy sheriklarining hissasi: Rossiya — 11,4 foiz, AQSH — 14,1 foiz, Janubiy Koreya — 11,1 foiz, Shvetsariya — 9,4 foiz, Niderlandiya — 7,2 foizni tashkil etdi.

O`tgan yillar mobaynida respublikada xorijiy investitsiyalar ishtirokidagi qo`shma korxonalar tuzish borasida muayyan ijobiy ishlar amalga oshi-rildi. 2003yilga kelib respublika bo`yicha 43 ta qo`shma korxona ro`yxatdan o`tgan bo`lib, shundan ishlab chiqarish sohasida 32 ta, savdo sohasida 2 ta, xizmat ko`rsatish sohasida 4 ta, qishloq ho`jalik sohasida 4 ta, transport sohasida 1 ta korxona faoliyat ko`rsatmoqda.

Respublikada 2003-yil 1-yanvar holati bo`yicha chet el kredit liniyalari orqali 6,5 million AQSH dollari miqdorida investitsiyalar, shu jumladan 5,6 million AQSH dollari miqdorida to`g`ridan-to`g`ri investitsiyalar jalb etildi. Xorijiy investitsiyalar ishtirokidagi korxonalar tomonidan ishlab chiqarilgan mahsulotlar va ko`rsatilgan xizmatlar hajmi 2003-yilda 2,2 milliard so`mni tashkil etdi.

Granit plitalari, tikuv, konditer va qurilish mahsulotlari kabi 8 turdagi yangi mahsulotlarni eksport qilish yo`lga qo`yilib, ularning umumiy soni 23 taga yetdi.

Eksport qilingan tovarlar hajmi 122,9 million dollarga teng bo`ldi. Uning tashqi savdo oborotidagi ulushi 53,8 foizni tashkil etdi. G`arb mamlakatlariga eksport qilingan xomashyo 113,6 million AQSH dollarini, MDH mamlakatlariga jo`natilganlari esa 9,3 million AQSH dollarini tashkil etdi.

Uzoq G`arbga asosan paxta tolasi, toladan olingan mahsulotlar, qayta ishlangan neft mahsulotlari sotildi. Paxta tolasi jami eksport mahsulotlarining 95 foizini tashkil etdi.

2002-yilda respublikada ishlab chiqarilgan 26,1 million AQSH dollari miqdoridagi tovarlar eksport qilindi.