Mundarija: I. O‘quv materiallar 1 Ma’ruza mashg‘uloti materiallari

24-MAVZU. Startoldi holatlari -ning psixologik xususiyatlari. 
Reja: 
1. Startoldi holatlarining psixologik xususiyatlari. 
2. Startoldi lixoradkasi, startoldi apatiyasi, xotirjamlik xolati, jangovarlik xolati.
Har bir sportchi musobaqa oldidan startoldi xolatini boshdan kechiradi.
Bunday holatning kelib chiqishiga nima sabab bo‘ladi? 
Umuman olganda buning sababi, birinchi savoldagi emotsional zo‘r 
berishlarining tavsifida tilga olingan jihatlardan iboratdir.
Startoldi emotsional his-hayajonlar qachon boshlanadi? Sportchining startoldi 
holatlari turli paytlarda yuz berishi mumkin. Ba’zi sportchilarda bu holat biron bir 
musobaqada ishtirok etishi haqidagi xabarni olishi bilanoq boshlansa, ba’zi 
birlarida ushbu musobaqaga start berilishidan bir necha kun yoki bir necha soat 
oldin boshlanishi mumkin. 
Startoldi holatlarining paydo bo‘lish vaqti nimalarga bog‘liq? Sportchilardagi 
startoldi holatining paydo bo‘lishi ularning shaxsiy-individual xususiyatlariga,
ya’ni asab tizimining turiga, temperamentiga, xarakteriga, sport musobaqalarda 

---

ishtirok etish bo‘yicha to‘plagan tajribasiga va xokazolarga bog‘liq.
Sportchilarning musobaqalarda ishtirok etish oldidan startoldi holatlarini boshdan 
kechirishlari zarurmi? Ushbu savolga startoldi holatlarining fiziologik 
mexanizmlarini ochib berish orqali javob olish mumkin. Fiziologiya fani nuqtai 
nazaridan startoldi holatlarining mexanizmlari shartli refleks xarakteriga egadir.
Ularning asosida sportchi organizmining oldinda turgan kuchli harakat 
faoliyatiga funktsional tayyorgarligi yotadi. Sportchi organizmida start oldidan 
yuzaga keladigan fiziologik o‘zgarishlar shartli reflektor moslashuvchanlik 
reaksiyalari hisoblanib, ular sportchi oldida turgan jismoniy ishlarning bajarilishini 
ta’minlaydi. Masalan ular qatorida yurak – qon tomir tizimi reaksiyasi, nafas olish 
faoliyatining o‘zgarishi, ichki sekretsiya bezlarining va boshqa organlardagi 
o‘zgarishlarni tilga olib o‘tish mumkin. 
Psixologik nuqtai nazardan olib qaraganda musobaqalar oldidagi psixologik 
zo‘riqishni odatda shunchaki his- hayajon deb atashadi. Start oldidan hayajonlanish 
(albatta belgilangan me’yor darajasida) nafaqat mumkin, balki zarur hamdir.
Chunki, startoldi hayajonini his etmasdan, kishi o‘z imkoniyatlarini to‘liq 
namoyish eta olmaydi. Bunday vaziyatlardagi hayajonlanish, odatda, sport 
o‘yinlaridagi ko‘tarinki kayfiyat, umumiy ko‘tarinki jangovor ruh, sport janglarini 
intiqlik bilan kutish tarzida namoyon bo‘ladi. Har bir sportchi nafaqat musobaqa 
oldi his-hayajonlari dinamikasining umumiy qonuniyatlarini bilishi, balki ayni 
paytda bu boradagi o‘zining individual xususiyatlarini ham yaxshi bilishi kerak.
Zero o‘z holatini to‘g‘ri anglab yetish, uni me’yorlashtira olishning bosh yo‘lidir.
Startoldi holatlarining psixologiyasini o‘rganishga bag‘ishlangan dastlabki 
tadqiqotlar (O.A.Chernikova, 1937) “startoldi lixoradkasi” ning o‘ziga xos 
jihatlarini ochib berdi, ya’ni uning sportchi xatti-harakatlariga ta’sir qilishini 
hamda ushbu masalani o‘rganish sportchilarni musobaqaga tayyorlashda o‘ta 
muhim ekanligini ko‘rsatdi. Ushbu yo‘nalishdagi tadqiqotlarda G.M.Gagaeva,
S.M.Oya, Yu.Yu.Palayma, A.S.Puni va boshqalar tomonidan startoldi xolatining 
asosiy turlari aniqlangan. Mazkur tadqiqotlarda startoldi holatlari alohida 
psixologik va fiziologik xususiyatlari bilan ajralib turishi qayd etilgan. Bu holatlar 
sportchining, ishchanligiga hamda musobaqalashuv sharoitlarida u amalga 
oshiradigan xatti-harakatlarning natijasiga ta’sir ko‘rsatishi aniqlangan. Startoldi 
holatining 4 ta turini alohida ajratib ko‘rsatish mumkin:
• Startoldi lixoradkasi 
• Startoldi apatiyasi 
• Jangovor holat 
• Xotirjamlik holati 
1. Startoldi lixoradkasi - ushbu holat quyidagi psixologik xususiyatlari bilan 
ajralib turadi:
a) kuchli hayajonlanish, ba’zi hollarda bu hayajon sportchi faoliyatini asosiy 
maqsaddan chalg‘itadi; 
b) his-hayajonlarning beqarorligi, ularning birini ikkinchisi, ba’zan mutlaqo 

---

teskarisi bilan tez-tez almashib turishi; 
v) diqqatning chalg‘ishi, parishonxotirlik; 
g) idrok va tasavvurdagi uzilishlar, sportchi start signali yoki trenerning 
maslahatlarini o‘z vaqtida eshitmasligi mumkin; 
d) xotiraning susayishi. Bunday holatda, sportchilar asosiy e’tibor qaratilishi 
lozim bo‘lgan jihatlarga talab darajasida e’tibor qaratmaydilar; 
e) fikrlar chalkashib, biri ikkinchisiga o‘tib ketadi. 
Tashqi belgilari:
• Tomir urishi va nafas olishning tezlashuvi; 
• Qo‘l va oyoqlarning qaltirashi; 
• Oyoq va qo‘llarning sovuqqotishi; 
• Terlab ketish, yuzning oqarib ketishi; 
• Ba’zi hollarda og‘izning qurishi, oshqozon buzilishi va hokazolar kuzatiladi. 
Fiziologik nuqtai nazardan startoldi lixoradkasi kuchli hayajonlantiruvchi asab 
jarayonlarining ko‘tarilishi va tormozlovchi asab jarayonlarining susayishi bilan 
bog‘liqdir. 
Startoldi lixoradkasi ko‘pincha sportni yaqinda boshlagan sportchilarda yoki
yetarli darajada tayyorgarlik ko‘rmagan sportchilarda shuningdek, qiziqqon, har 
narsaga birdaniga qizishib ketadigan sportchilarda kuzatiladi. 
Ushbu emotsional holatni bartaraf etishda sportchining e’tiborini musobaqadan 
boshqa narsaga jalb etish yaxshi natija beradi. Ularga quyidagilarni misol keltirish 
mumkin:
• so‘zlashuv usuli—bunda sport trener yoki psixolog sportchining e’tiborini 
musobaqaga mutlaqo aloqasi bo‘lmagan boshqa mavzularga qaratadi. 
• Qizitish mashqlari (tinchlantiruvchi va murakkab koordinatsiyali mashqlarni 
berish).
• Massaj, o‘z-o‘zini massaj qilish (tinchlantiruvchi). 
• Diqqatni chalg‘itish usullari.
• Ortiqcha zo‘riqishni susaytirish maqsadida o‘z-o‘zini tartibga solish. 
2. Startoldi apatiyasi. Ushbu holat startoldi lixoradkasining tamoman teskarisi 
bo‘lib, unda quyidagi xususiyatlar kuzatiladi:
a) qo‘zg‘aluvchanlikning susayishi. Odatda bu holat barcha psixik 
jarayonlarning o‘ta bo‘shanglik bilan bajarilishida va ba’zan hatto uyqusirash 
holatiga tushish tarzida namoyon bo‘ladi;
b) musobaqada ishtirok etish xohishining yo‘qligi; 
v) astenik kayfiyatning paydo bo‘lishi, kuchsizlanish, idrok, diqqat, tafakkur 
va boshqa jarayonlar sur’ati va hajmining pasayishi. 
Startoldi apatiya holati fiziologik jihatdan bosh miya qobig‘idagi qo‘zg‘atuvchi 
jarayonlarning pasayishi va tormozlovchi jarayonlarning kuchayishi bilan bog‘liq 
bo‘ladi. 
Bunga sabab sportchining o‘ta charchaganligi yoki me’yordan ortiq mashq 
qilib yuborganligi ham bo‘lishi mumkin. Agar sportchida yuqorida aytilgan 

---

xolatlar kuzatilmagan bo‘lsa, bu holatni bartaraf etish uchun xuddi startoldi 
lixoratkasida qo‘llangan usullardan foydalanish mumkin. Faqat ularning aksini 
qilish lozim bo‘ladi.
3. Jangovor tayyorgarlik xolatiga quyidagilar xosdir.
a) oldinda turgan musobaqaga butun diqqatni jalb etilishi, diqqat hajmining 
oshishi; 
b) sportchi o‘z kurashida nimani hisobga olish kerakligini va qanday 
usullardan foydalanishi kerakligini juda yaxshi eslab qoladi va biladi; 
v) ushbu holatda sportchining harakatlari, reaksiya vaqti va unda kechayotgan 
psixik jarayonlarining tezlashuvi yuz beradi; 
g) sportchida yuqori darajadagi irodaviy zo‘r berish qobiliyati kuchayadi. 
Jangovor holatning fiziologik asosi sportchi organizmining barcha tizimlari 
jismoniy ishchanlik qobiliyatining umumiy ko‘tarinkiligi, qo‘zg‘alish va 
tormozlanish asab jarayonlarining optimal holatda bo‘lishidan iboratdir.
Jangovor holat yuqori darajada mashqlangan, yaxshi tayyorlangan va 
musobaqalarda ishtirok etish bo‘yicha katta tajribaga ega bo‘lgan sportchilarga 
hosdir.
4.Xotirjamlik holati. Ushbu xolat aksariyat hollarda sportchilar sport 
musobaqalarida raqibi imkoniyatini suniy ravishda pasaytirib, o‘zlari uchun juda 
kuchsiz raqib deb hisoblaydigan va shu sababli uning ustidan yengilgina g‘alaba 
qozonaman deb o‘ylaydigan holatlarda yuzaga keladi. Mazkur holatda quyidagilar 
kuzatiladi:
a) g‘alaba uchun zarur bo‘lgan hushyorlik va safarbarlik holatining yo‘qligi; 
b) diqqat jadalligining pasayishi, idrok, tafakkur jarayonining sekinlashuvi,
sport jangini olib borishdagi xushyorlikning susayishi. 
Odatda o‘zini xotirjam tutish holati sportchilarda ular chindan ham o‘zlaridan 
ancha ojiz raqiblar bilan maydonga tushganda kuzatiladi. Ushbu holat sportchining 
ishchanlik, bor kuch g‘ayratini safarbar etish qobiliyatlariga salbiy ta’sir etib,
natijada uning hatti - harakatlaridagi yakuniy natijalar darajasi pasayib ketadi. 

---