Muallifdan

ОНА ТИЛИМ

Гарчи зуғум қилганларни ёқтирмадим, Шеър ёздиму бўлак ишни қотирмадим. Тилим туриб ўз тилимда гапирмадим, Бир эсласам эзилади бағри-дилим,

Она тилим, кечир мени, она тилим.

Онам «эркам» деб қучганда тунлар ярим, Эрким йўқ деб зирқирарди бир жойларим, Паровозни ҳансиратган буғдойларим, Олтинларим, маъданларим, ипакларим, Она тилим, кечир мени, она тилим.

Кимлар учун биз эдик бир бадавийлар, Ўзбекни қон қақшатганни ўзбек сийлар, Ҳолимизни қон кузатди Яссавийлар,

Топганимиз ҳандалакдек тилим-тилим, Она тилим, кечир мени, она тилим.

Кимдир майда миллат бўлди, кимдир катта,

Катта миллат — Афандиси йўкдир ҳатто, Биз пиёда, биз боққанлар юрди отда,
Зулм ўтса фақат сендан ўтди зулм, Она тилим, кечир мени, она тилим.

Сен бўлмасанг нима бизга силлиқ шеърлар, Бу дунёда тили йўқда дил йўқ дерлар,

Баҳоинг-ку бериб кетган Алишерлар, Юрагимнинг тўридаги сўлмас гулим, Она тилим, кечир мени, она тилим.

Бир қарасам ҳар шевангда минг жилолар Ҳар новдангда, ҳар мевангда минг жилолар. Қодирийлар, Чўлпонлар-у, Абдуллолар,

Сенинг қайтган кунинг мен туғилган йилим, Она тилим, эй муқаддас Она тилим.

НЕГА ЙИҒЛАМАЙСАН

Қани Боғишамол кезган елларинг, Қирларда кеккайган қирғовулларинг, Эслаб эзилмасму энди дилларинг,

Нега йиғламайсан, аҳли Андижон?..

Минг йиллик чинорлар бўлди-ку ўтин, Қошу қабоғингга тўлди-ку тутун,

Сойингда қолдими сувинг бир ютум, Нега йиғламайсан, аҳли Андижон?

Ризқу-рўзин сочиб айланар фалак, Сен эса далангдан тополмай ҳалак — Болашта бергали битта ҳандалак,

Нега йиғламайсан, аҳли Андижон?

Наҳорингда пахта, шомингда пахта, Айвонингда пахта, томингда пахта. Оқар оғу бўлиб қонингда пахта,

Нега йиғламайсан, аҳли Андижон?

Қирқ йил чорла, гўрдан чиқмайди Бобур, Чиқса ҳам бағрингга сиғмайди Бобур.

Ҳинду қучоғида ухлайди Бобур, Нега йиғламайсан, аҳли Андижон?

Қайинзор қаъридан узилди бир ўқ, Юракда доғ қолди, юракда бир чўғ, Чўлпонинг бор эди, Чўлпон энди йўқ. Нега йиғламайсан, аҳли Андижон?..

Булбулзабонларинг хазон ёпдими,

Дунё уларнинг ҳеч тенгин топдими, Муҳаммад Юсуфинг шоир бўптими?..
Нега йиғламайсан, аҳли Андижон?