Молиявий ҳисоб 1 Ўқув қўлланма

2. Кейин юз берадиган ҳодисаларнинг тавсифи
Ҳодиса молиявий ҳисоботларга сезиларли таъсир кўрсатса у кейинги ҳодиса сифатида қаралади. Кейинги ҳодисалар шу сабабдан акс эттирилиши керакки, улар молиявий ҳисоботдан фойдаланувчиларнинг ҳисобот эгасининг бизнес истиқболини тушуниши ва баҳолашига таъсир қилиши мумкин.
3. Молиявий ҳисоботда ёритиш
Стандартлар бу ҳодисаларга изоҳ беради ва улар ҳодисанинг тавсифига боғлиқ равишда, ёки ҳисоботларда (бухгалтерия баланси, молиявий натижалар тўғрисидаги ҳисобот ва ҳоказоларда), ёки изоҳловчи ёзувларда акс эттирилиши кераклигини кўрсатади. Кейинги ҳодисалар натижалари, ҳисоботларда акс эттирилиши керак, агар улар:

• 
  бухгалтерия баланси санасида мавжуд бўлган шароитларнинг тўлдирувчи исботи бўлиб хизмат қилса;
  
• 
  молиявий ҳисоботларни тайёрлаш жараёнининг ажралмас қисми бўлган ҳисоб-китобларга таъсир қилса;
  
• 
  ҳисоб-китоблар натижасида молиявий ҳисоботларга тузатишлар киритиш лозим бўлса.
  

Масалан, фараз қилайлик, бухгалтерия баланси санасига компания дебиторлик қарзини олиш шубҳали эканлигини билмайди. Бироқ, бухгалтерия балансини тайёрлаш ва чоп этиш санаси ўртасидаги оралиқ даврда компания кўрилаётган дебиторлик қарзи банкрот деб эълон қилинган компанияга тегишли эканлигини аниқлайди; шундай қилиб, қарзни тўлик олиш жуда шубҳали. Дебиторнинг молиявий ҳолати бирор давр мобайнида ёмонлашган, демак, кутилаётган зарар бухгалтерия баланси санасида эътироф этилиши керак.
Кейинги ҳодисалар, агар улар бухгалтерия баланси санасига мавжуд бўлмаган, бу санадан кейин келиб чиққан шароитлар натижалари бўлса, ҳисоботларда эмас, балким изоҳловчи ёзувларда ёритилиши керак.
Буларга мисол:

• 
  облигацияларни сотиш ёки акцияларни чиқариш.
  
• 
  бухгалтерия баланси санасидан кейин содир этилган ҳодиса бўйича суд жараёни.
  
• 
  бухгалтерия санасидан кейин рўй берган ҳалокатлар натижасидаги ТМЗдаги зарарлар, масалан ёнгин ёки сув тошқини натижасида.
  

Аксарият кейинги ҳодисалар молиявий ҳисоботлар тайёрлашда кўриб чиқишни талаб қилмайди. Булар компания акциялари бозор кийматининг ўзгариши, иш ташлашлар, янги маҳсулот ишлаб чиқиш, бошқарувдаги ўзгаришлар, иттифоқни тан олиш ёки бекор қилиш каби саволлар бўлиши мумкин.