Moliya-iqtisod

Uchinchi bosqich, 1997-yildan keyingi yillar soliq islohotlarini chuqurlashtirish.

Soliq tizimining rivojlanishi mamlakatdagi iqtisodiy islohotlar bilan hamqadam borayotganligini aytib o’tishga hojat yo’q. 1997-yil 24-aprelda O’zbekiston Respublikasi Soliq Kodeksining tasdiqlanishi soliq tizimini isloh qilishning hozirga qadar amalga oshirilayotgan 3-bosqichining boshlanishi bo’ldi.

Soliq Kodeksining qabul qilnishi katta tarixiy ahamiyatga ega bo’ldi va soliqqa tortishning barcha asosi bo’luvchi huquqiy me’yorlarni yagona hujjatga to’pladi. Soliqlar imtiyozlarini tizimlashtirdi; foyda, mol-mulk, QQS ni hisobga olish va soliqqa tortishning xalqaro tizimini o’rganish va undan foydalanishga imkon berdi.

Bu bosqichda yuridik shaxslarga, birinchi navbatda kichik va o’rta biznes uchun soliqqa tortish, hisobga olish va hisobotning soddalashtirilgan tizimini barpo etishga erishildi. Kichik tadbirkorlik subyektlari ixtiyoriy asosda umumdavlat va mahalliy soliqlar hamda yig’imlar jamlamasi o’rniga yagona soliq to’lay boshladi.

O’zbekiston Respublikasi Vazirlar Mahkamasining 1998-yil 15-apreldagi 159-son qarori bilan kichik korxonalar va mikrofirmalar uchun soliqqa tortishning soddalashtirilgan tizimini qo’llash tartibi joriy etildi.

Agar ilgarilari aksizlanadigan tovarlarni ishlab chiqaruvchi korxonalarga soddalashtirlgan soliqqa tortish tizimi kirmagan bo’lsa, 1999-yil 10-oktabrdan boshlab ular aksiz solig’ini to’lash sharti bilan mazkur tizimni qo’llash tartibi o’rnatilgan.

Vazirlar Mahkamasining 1998-yil 10-apreldagi 153-son qarori bilan tasdiqlangan savdo va umumiy ovqatlanish korxonalarini soliqqa tortish tartibiga muvofiq yalpi foyda savdo korxonalari uchun yagona soliqqa tortish obyekti bo’ldi. O’sha vaqtlarda soliq stavkasi daromadlilik darajasiga va faoliyat turlariga qarab guruhlanadi.

1999-yildan boshlab qishloq xo’jalik shirkatlari, fermer xo’jaliklari, agrofirmalar, qishloq xo’jalik mahsulotlarining boshqa ishlab chiqaruvchilari Respublika prezidentining ,,Qishloq xo’jaligi Tovar ishlab chiqaruvchilari uchun yagona yer solig’ini amalga kiritish to’g’risida”gi farmoni hamda Vazirlar Mahkamasining 1998-yil 26-dekabrdagi 539-son qarori asosida ishlab chiqilgan budjet bilan hisob-kitoblar mexanizmiga ko’ra yagona yer solig’i to’lovchilari bo’ldilar. U amaldagi barcha umumdavlat hamda mahalliy soliqlar va yig’imlar o’niga amalga kiritildi. Shuningdek ushbu soliq turiga doir imtiyozlar ham belgilandi. Bu qishloq mehnatkashlariga hisobot hujjatlarini qisqartirish imkonini beruvchi soliqqa tortishning soddalashtirilishiga yana bir misoldir.

Keyingi yillarda soliq to’lovchilar zimmasidagi soliq yukini kamaytirishga, ishlab chiqaruvchilarga yengilliklar yaratishga qaratilgan soliq siyosati olib borilmoqda. Bu esa o’z navbatida iqtisodiyotda ijobiy o’zgarishlarga olib kelmoqda. (2-rasm)