Mishyak, surma, vismut va ularning birikmalari

18. Oson suyuqlanadigan qotishmani tayyorlash
(Vud qotishmasi).
(Ish mo’rili shkafda bajarilsin)
20 g vismut, 5 g qo’rg’oshin, 2,5 g qalay va 2,5 g kadmiylarni tortib oling.
Temir yoki chinni tigelga 20 g vismutni va metallni oksidlashdan saqlash uchun ozgina parafindan soling. Parafinning miqdori uni suyultirilganda metall sirtida 1 sm qalinlikda qatlam hosil bo’lishi uchun yetarli bo’lishi kerak. Tigelni asbest kartoniga qo’yib, vismut eriguncha qizdiring. Suyuqlanmaga temir tayoqcha bilan aralashtirib, ketma-ketlikda qo’rg’oshin, qalay va kadmiylarni qo’shing.
Bir jinsli suyuqlanma hosil bo’lguncha aralashtiring. Suyuqlanmani sovutmasdan, sovuq suvli chinni stakanga quying. Qotishma sirtidagi parafinni benzin yoki efirda namlangan mato bilan tozalang. Qog’ozdan tayoqcha shakllarini tayyorlang va qotishmani havoda suyuqlantiring (parafinsiz). Suyuqlanish haroratini o’lchang va qog’oz shakllarga quying.
Agar hosil bo’lgan tayoqchani qaynab turgan suvga solinsa, u suyuqlanadi. Vud qotishmasining suyuqlanish harorati 70°C.