«Минерал ўғитлар технологияси» фани бўйича: Минерал ўғитларнинг халқ хўжалигидаги аҳамияти

Ишлаб чиқариш кўрсаткичлари. Суперфосфат ишлаб чиқаришда фосфатли хом-ашё парчаланишининг тўлалиги парчаланиш коэффициенти, яъни суперфосфатдаги ўзлашадиган Р₂О₅ нинг умумий Р₂О₅ микдорига нисбати орқали топилади. Сульфат кислота меъёри қанчалик катта бўлса, парчаланиш коэффициенти ҳам шунчалик юқори бўлади. 68…72 оғирлик қисм меъёрида апатит концентратидан олинган камерали суперфосфатдаги парчаланиш коэффициенти 83…88% га тенг ва суперфосфатда маълум микдордаги (11…12%) эркин фосфат кислота бўлади. Суперфосфатнинг омбордаги етилтириш жараёнида эса парчаланиш коэффициенти 93…95% га етади, эркин фосфат кислотаси эса -5% гача камаяди.
Олинган суперфосфат микдорининг уни ишлаб чиқариш учун сарфланган фосфат миқдорига нисбати суперфосфат унуми дейилади. Фосфатдаги Р₂О₅ тўлалигича суперфосфатга ўтади, шунинг учун унум фосфатдаги Р₂О₅ нинг фоиз миқдорини маҳсулотдаги умумий Р₂О₅ нинг фоиз миқдорига нисбати билан ифодаланади. Апатит концентратидан янги ҳосил қилинган суперфосфатнинг унуми 1,94…2,01 ни, фосфоритдан олинган суперфосфат унуми эса 1,5…1,9 ни ташкил этади. Суперфосфатни омборда сақланиши натижасида ундан сувнинг буғланиши ҳисобига унум маълум даражага пасаяди.
Маҳсулотнинг гигроскопиклиги ва унинг нейтралланиши. Юқори эркин кислоталиликка (5% дан юқори Р₂О₅) эга бўлган суперфосфат 20°С температурада ҳавонинг нисбий намлиги 70…100% бўлганда атмосфера намлигини ютади. Буни суперфосфат суюқ фазасининг тўйинган буғ босими (1,33…1,81 кПа) худди шу температурадаги сувнинг тўйинган буғ босими (1,63…2,33 кПа) дан кичик эканлиги билан изоҳланади. Ютилган намлик маълум миқдордаги монокальцийфосфатни эритади, унинг дикальцийфосфат ва фосфат кислотага парчаланишига олиб келади. Ажралган қўшимча миқдордаги эркин фосфат кислотаси суперфосфатни янада гигроскопиклигини оширади.
Бундай суперфосфат ёмон физик хоссага эга бўлади - ёпишқоқ бўлиб қолади, тушириш ва юклаш мосламаларига ёпишиб қолиши натижасида қийинчиликлар туғдиради. Бундан ташқари, механизмларнинг коррозиясини тезлаштиради. Шунинг учун етилтирилган суперфосфат фосфат кислотада осон парчаланувчи нейтралловчи қўшимчалар билан нейтралланади. Одатда, нейтралланиш жараёни грануллаш билан бир вақтда амалга оширилади. Нейтралловчи қўшимча сифатида осон парчаланадиган майда фракцияли фосфорит уни, суяк кукуни, оҳак, бўр, оҳактош, фторсизлантирилган фосфатлар ва бошқалар ишлатилади. Таркибида фосфор тутган нейтралловчи қўшимчалар маҳсулотни бойитади. Фосфоритнинг қўлланилиши натижасида эркин Р₂О₅ нинг 1% га камайиши ҳисобига, эквивалент суратда, маҳсулотдаги ўзлашадиган Р₂О₅ нинг миқдори ўртача 0,42% га ортади. Суперфосфатдаги фосфат кислотани кальций бирикмалари билан нейтраллаш натижасида маҳсулот таркибида қўшимча миқдордаги кальций монофосфат ҳосил бўлади. Бунда суперфосфатдаги қаттиқ компонентлар микдори ортади ва унинг физик хоссаси яхшиланади. Суперфосфатдаги кислоталиликни керагидан ортиқ даражада камайтириш сувда кам эрийдиган дикальцийфосфатнинг ҳосил бўлишига олиб келади, оҳакнинг ортиқча бўлиши эса, қийин эрийдиган трикальцийфосфат ҳосил бўлиш билан борадиган ретроградацияланишга олиб келади. Маҳсулот таркибининг айрим қисмларидаги ретроградация эса, реагентларнинг ёмон аралаштирилиши ҳисобига юзага келади. Шунинг учун нейтраллаш жараёнида қўшимчаларни маҳсулот билан яхши аралашишини таъминлаш лозимдир.