Микроорганизмлар экологияси. Тупроқ, сув, хаво ва одам микрофлораси

Қизилўнгачнинг доимий микрофлораси йўқ ёки жуда кам миқдорда бўлиб, булар, асосан, оғиз бўшлиғидаги микробларнинг вакиллари ҳисобланади.
Меъдага овқат билан бирга ҳамда оғиз бўшлиғидан кўп миқдорда ҳар хил микроорганизмлар тушади, лекин унинг микрофлораси нисбатан кўп эмас: 1 мл меъда суюқлигида 10³ микроблар бўлиб, улар, асосан, кислотага чидамли турлардир (лактобактериялар, Sarcina ventriculus, Bac. subtilis, ачитқи ва бошқалар).
Ингичка ичакнинг юқори бўлимларида микроорганизмлар меъдага нисбатан кам (1 мл да 10²–10³ атрофида) бўлади, бунга сабаб ўн икки бармоқ ичакка тушадиган ўт моддасининг бактерицид таъсири ҳисобланади. Бу ерда, асосан, лактобацилла, бифидумбактерия, Str. faecalis ва кандидалар (замбуруғлар) топилади (аутохтон микрофлора) (20-расм). Аллохтон микроорганизмларга ичак таёқчаси ва Н.pylori лар мисол бўла олади, бу микроблар ўн икки бармоқ ичакда яра пайдо бўлишига олиб келади (21-расм).
Йўғон ичак одам организми биоптатлари ичида энг кўп микроб тутувчи жой ҳисобланади. 1 г нажасда 10⁹–10¹¹ та 500 турдан ортиқ микроорганизм учрайди. Одам кунига нажас билан 17ґ10¹² микробларни ташқарига чиқаради. Облигат микрофлоранинг 98–99% анаэроб микроорганизмлар — бактероид, бифидобактерия, лактобактерия, фузобактерия, пептококк, клостридия, коринебактерия, пептострептококк ва бошқалар ҳисобланади. Факультатив анаэроблар — E.coli, Str. faecalis, Enterobacter, Citrobacter ва бошқалар (22-расм).
Аллохтон микроорганизмларга қуйидагилар киради: Proteus, Klebsiella, Cl. perfringes, Cl. sporogenes, Ps. aeruginosa, C. albicans, Ent. coli ва бошқалар.
Щундай қилиб, йўғон ичак микрофлорасини қуйидаги 4 гуруҳга бўлиш мумкин:
1. Микрофлоранинг асосий массасини спора ҳосил қилмайдиган қатъий анаэроблар ташкил этади,
2. Иккинчи гуруҳ грамманфий E.coli ва граммусбат энтерококклар, спора ҳосил қилмайдиган Lactobacillus туркумининг сут ачитқи таёқчалари
3. Учинчи гуруҳга факультатив анаэробларнинг қолдиқ микрофлорасидан ташкил топган (йўғон ичак микробларининг 0,01–0,001%). Бу гуруҳга Staphylococcus, Proteus, Clostridium, Pseudomonas, Candida лар мисол бўла олади.
4. Тўртинчи гуруҳга Enterobacteriaceae оиласининг ичак инфекцияларини қўзғатиши мумкин бўлган доимий ва вақтинча учрайдиган вакиллари (Salmonella, Shigella, Enterobacter ва бошқа туркум аъзолари) киради.