Mikrobiologiya va immunologiya

Natija ijobiy hisoblanadi:
Patologik materialdan grammanfiy, kapsula hosil qiladigan, harakatsiz tayyoqchasimon bakteriyalar kulturasi ajratilsa; ular glukoza, saxaroza, sorbit va mannitni parchalasa, indol hosil qilmasa, biosinovda virulentligi tasdiqlansa.


2-Savol- Saramas kasalligi qo’zg’atuvchisining ifodasi va laboratoriya diagnozi.
Cho’chqalar saramasi – zooantroponoz yuqumli kasallik bo’lib, o’tkir kechganida septisemiya holati va yallig’langan eritema, surunkali kechganda – endokordit va artritlar namoyon bo’lishi bilan xarakterlanadi. Uch oylikdan bir yoshgacha bo‘lgan cho‘chqalar, uch - to‘rt haftadan katta qo‘zilar kasallanadi. Boshqa tur hayvonlarda kasallik kam uchraydi. Odamlar ham kasallanadi.
Cho’chqalar saramasi qo’zg’atuvchisi – Erysipelothrix rhusiopathiae, Erysipelothrix (erizipelotriks) avlodiga mansub. U Paster tomonidan 1882 yilda ochilgan.
Morfologiyasi. E. rhusopathiae – polimorf, kalta 0,2 -0,3 x 0,5 -1,5 mkm o’lchamdagi qisqa tayoqcha, bittadan yoki zanjir shaklida joylashadi. Harakatsiz. Spora va kapsula hosil qilmaydi. Grammusbat. Eski kulturalarda, shuningdek yurakning zararlangan klapanlaridan tayyorlangan surtmalarda uzun iplar shaklida, buyrak, jigar, taloqdan tayyorlangan surtmalarda bakteriyalar bittadan, ikkitadan yoki to’p bo’lib joylashadi. Fluoressensiyalovchi zardob bilan bo’yalgan surtmalar saramas bakteriyasiga xos xarakterli konturda yorug’lik (nurlanish) +++ bersa, natija ijobiy hisoblanadi.
Kultural xususiyatlari. E.rhusiopathiae mikroaerofil (5-10% CO₂), aerob. GPB, GPA, GPJ, yarim suyultirilgan agar, qon zardobi, uglevodli muhitlar, elektiv muhit Sent – Ivani (tarkibida 0,1 kristallviolet va 1% natriy azidi bor GPA) muhitida, pH 7,2-7,6, 37⁰C da 18-24 soatda o’sadi. GPB da kamroq loyqalanish paydo qiladi. 48-72 soatdan keyin muhit tinib, cho’kma hosil bo’ladi, qoqib ko’rganda bulut singari ko’tariladi. GPA da tiniq, shudring tomchisiga o’xshash (S-shakl) koloniyalar hosil qiladi, lekin R – shakli ham uchrab turadi – ular yirik, yuzasi notekis, chetlarida ildizsimon o’simtalari bor koloniyalar hosil qiladi. Bunday koloniyalar kasallik surunkali kechganda ajratiladi. GPJ da 6-10 kundan keyin gorizontal o’smalar paydo bo’ladi, jelatina erimaydi.