Microsoft Word yukduzlar mangu yonadi ziyouz com doc

www.ziyouz.com kutubxonasi 
47
XXVI 
Бўри полвон тотли-тотли кулимсиди. 
"Во уккағарнинг ўғли-е, отамнинг пири деди-я! — дея хаёлланди. — Шундай демаганда, 
йиқитолмасдиям-да! Уни менинг пирим қўллади, ҳа! Э, бали, ўғлим-е, бали!" 
Бўри полвон ўғли эмас, гўё ўзи ғолиб бўлмишдай керилди. Теваракка керилиб-керилиб 
қаради. 
Шўрчиликлар, Максим полвон йиқилади, деб ўйламади. Хаёлигада келтирмади. Шу боис, 
ҳанг-манг бўлиб қолди. Даврага энди қайси полвонларини чиқаришларини билмади. 
Шунда, шўрчиликлар оқсоқоли: 
— Тиловберди полвон бир майдон дамини олсин, биз унгача кимни чиқаришни кенгашиб 
оламиз! — деди. 
Тиловберди полвон тўнни фотиҳа берган чоллар олдига қўйди. 
Даврадан чиқиб турди. 
XXVII 
Бўри полвон давра айланди. 
Ёнига бир полвон гурсиллаб тушди: Темир полвон Берди полвонни ит чилга олиб йиқитди. 
Берди полвон орига ўрта ёшлардаги бир полвон чиқди. 
Темир полвон талабгор юз-кўзига қаради. Кейин ўзига-ўзи фотиҳа ўқиди. Гап йўқ, сўз йўқ, 
даврадан чиқди-кетди. 
Давра ҳайрон бўлди. 
Бўри полвон бориб, гапиришиб келди. 
Юзларида табассум ўйнади. Овози тўла фахр бўлди, овози тўла ғурур бўлди: 
— Халойиқ! — деди. — Мен Темир полвон билан гапиришдим, ҳа! Уккағар, қойилман 
деяпти! Нимага дейсизми? Манави талабгор Чори полвон ўз вақтида Темир полвонга бош-қош 
бўп, тўйларга олиб борган, ўзининг ҳунарларидан унгада ўргатган экан! Шунга, Темир полвон 
айтяптики, у киши менга устоз бўладилар, мен устозимнинг ёқасидан ушламайман, деяпти! Сиз 
нима дейсиз, халойиқ! 
— Отасига раҳмат ўша полвоннинг! 
— Асл полвон экан! 
— Шундай фарзандларнинг умри узоқ бўлсин! 
— Туф-туф-туф, кўз тегмасин-э, асл ўзимизга тортибди! 
Бўри полвон кўзлари олма терди. Охирги гапни айтмиш одамни излади. Аммо тополмади. 
"Бали! Бизнинг аслимиз ана шундай эди! — Бўри полвон хаёлан шу гапни айтмиш одам 
билан гапиришди. — Инчунун, ўз аслига тортмаган, ўз аслини унутган одам — одам ҳам эмас!"