Microsoft Word togaymurod otamdan qolgan dalalar lotin ziyouz com doc

 
27
Men tushlarda o‘zimga kelaman. Oshpaz qiz turg‘azib oladi. 
— Tur o‘choqqa o‘t yoq, — deydi. — Direktor tayinlab ketdi. 
O‘choq qoshida cho‘k tushib o‘t yoqaman. Qozonda bilq-bilq qaynamish sho‘rva ko‘nglimni 
aynitadi. 
Men o‘qchib-o‘qchib o‘t yoqaman. 
 
28
Yo‘qlamada Ziyod yo‘q bo‘ladi. 
Direktorimiz Fizika bilan Kimyoni dorilanuvchi dala jo‘natadi. 
Muallimlarimiz hayallab-hayallab qoladi. 
Direktorimiz bizni uxlatmay olib o‘tiradi. 
Nihoyat, muallimlarimiz qaytib keladi. 
Oldin Ziyod kirib keladi. Ostonada ko‘zlarini uqalab-uqalab turadi. Mudrab-mudrab turadi. Gap 
yo‘q, so‘z yo‘q —o‘z to‘shagi taraf yuradi. O‘zini tap etib to‘shakka tashlaydi. 
Direktorimiz barmoq likillatib-barmoq likillatib o‘ziga imlaydi. 
— Ey, beri kel! — deydi. —Tur, beri kel! 
Ziyod direktorimiz oldiga boradi. Tevarak-boshiga alanglaydi-alanglaydi — o‘zini xiyol o‘nglaydi. 
Alanglashidan — Zied tevarakda o‘tirmish bolalarni endi ko‘radi. 
Direktorimiz Ziyodni lunjidan cho‘zadi. 
— Mastmi deyman! — deydi. — Buni qaerdan topdilaringiz-e? 
— Daladan topdik, — deydi Fizika. —Dalada odamzot qorasi yo‘q, lekin shu bor ekan. 
— Cho‘liboev, Cho‘liboev, deb qichqirib edik, g‘o‘zalar ichidan shitir-shitir etib chiqib keldi, — 
deydi Kimyo. 
— Qorong‘ida g‘o‘za ichida nima qilib yuribdi ekan? — deydi direktorimiz. 

---

Tog‘ay Murod. Otamdan qolgan dalalar (roman) 
www.ziyouz.com
kutubxonasi 
41
— Nima qilar edi, uxlab qolibdi-da. 
— O‘l-e, shu kuningga-e! — deya baqiradi direktorimiz. — Dorilangan g‘o‘za ichidayam 
uxlaysanmi-a? Uxlash uchun boshqa joy qurib qolganmi-a?! O‘l-e, bor-e, yot-e!! 
Direktorimiz Ziyodni ko‘ksidan itarib yuboradi. Ziyod keti bilan gup etib tushadi. 
29 
Ziyod shu yotishida qaytib turmaydi. Ertasi-da turmaydi. Indini-da turmaydi. Joyidan qimir 
etmaydi. Ko‘z ochmaydi, tuz totmaydi. 
Men Ziyodni og‘ziga choy sovutib tutaman. 
— Choy ich, Ziyod oshna, choy ich, — deyman. Ziyod lablarini olib qochadi. 
Ziyod mumsik-mumsak kulimsinadi. 
Ziyod shunday kulimsinadi, shunday kulimsinadi — beshikdagi chaqaloqday kulimsinadi! 
— Tush. ko‘rdim, Dehqonqul oshna, tush ko‘rdim, — deya pichirlaydi. 
— Tush ko‘rding! Nima tush ko‘rding? 
— Samolyot ko‘rdim, masalan. 
— Elovrama, Ziyod oshna, elovrama. Somolyotni dalada ko‘rib eding. 
— Tushimda-da samolyot ko‘rdim. Dehqonqul oshna, tushimda-da samolyot ko‘rdim. Men 
tushimda samolyot haydar emishman, masalan. O‘zimiz paxta terayotgan dalani aylanib-aylanib 
haydar emishman. Bolalar menga qo‘l silkib-qo‘l silkib qo‘yar emish. Men qo‘l silkimas emishman, 
masalan. Sababi — qo‘llarim rulda emish-da. Dehqonqul oshna, qo‘llarim rulda emish. Bor ovozim 
bilan ashula aytib-aytib samolyot haydar emishman. Direktor ko‘k ko‘sak g‘o‘zapoya o‘ynatar emish... 
Ey, ichburug‘, senga samolyot haydashni kim qo‘yibdi, der emish. Men parvo qilmas emishman, 
masalan. Direktor endi dag‘dag‘a qilar emish... Tush samolyotdan, der emish. Men ashula aytib-aytib 
samolyot hayday berar emishman. Samolyotimni aylantirib-aylantirib futbol maydonga qo‘ndirar 
emishman. Futbol maydondan cho‘nqayib-cho‘nqayib o‘targan beri beshinchi sinfni samolyotimga 
mindirib olar emishman. Men beshinchi sinfni mindirib uyimizga jo‘nar emishman, masalan. Direktor 
ketimizdan g‘o‘zapoya o‘ynatib qola berar emish... 
— Meniyam samolyotingga mindirasanmi, Ziyod oshna? 
— Mindiraman, Dehqonqul oshna, mindiraman, Faqat direktorni mindirmayman. Direktor qo‘l 
qo‘tarsa-da samrlyotimga mindirmayman, masalan...