Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
46
Kechayu kunduz pol aylandim. Marzalab bo‘ylab-bo‘ylab aylandim. 
Suv marzalarni urib keta berdi-urib keta berdi. 
Men suv urib ketmish joylarni ketmon bilan bitay berdim-bitay berdim. 
Suv ko‘lladi-ko‘lladi — dalam sho‘rini ostiga bosib-bosib yubora berdi. Dalam sho‘rini yer o‘lik 
qatlamiga cho‘ktirib-cho‘ktirib yubora berdi. 
Yer betida qolmish sho‘rni esa so‘rib-so‘rib ola berdi. Oqova suv bo‘lib oqib-oqib keta berdi. 
Sho‘r dalamni ikki bor ana shunday ko‘llatib-ko‘llatib suvladim. 
Sho‘r dalam sho‘rdan forig‘ bo‘ldi. 
4
Dalalarim uzra mezonlar uchmay qoldi. Dalalarim uzra sokin ham g‘amgin bir holat cho‘kdi. 
Dalalarim mudrab-mudrab oldi. 
Dalalarim ko‘z ilib-ko‘z ilib oldi. 
Dalalarim uyquga ketdi. 
Men endi dalalarimga qo‘l urishdan tiyildim. 
5 
Dalalarimdan qor aridi. 
Uzun qish qorayib-qorayib yotmish dalalarim yerrang-errang bo‘ldi. 
Dalalarimda omonat-omonat qotib yotmish kesaklar umalib-umalib tuproq bo‘ldi. 
Dalalarim ko‘pchib-ko‘pchib qoldi. 
Dalalarim to‘lg‘ondi. 
Dalalarimdan oppoq-oppoq hovur havolandi. Dalalarimdan elas-elas ovoz havolandi. 
Ovoz dalalarim ostidan keldimi yo olislardan keldimi — bilib bo‘lmadi. 
Dalalarim xo‘rsindi. 
Ovozda rang-ro‘y-da bo‘lmadi, ovozda bo‘y-bast-da bo‘lmadi. Ovoz deyin dedim — ovozga 
mengzamadi, ovoz demayin dedim—ovoz shunday peshonamdan keldi. 
Dalalarim entikdi. 
Dalalarim uyg‘ondi. Dalalarim ko‘z ochdi. 
Dalam meni imladi, dalam meni chorladi. 
6 
Bir tonna go‘ngga yigirma kilo kaliy aralashtirdim, yigirma kilo fosfor arashlatirdim. 
Dalalarimga sepib-sepib tashladim. 
Yer — xamir, o‘g‘it — xamirturush bo‘ldi. 
Dalalarimni takror shudgorladim. Dalalarim chet-chetlari chala qolmasin uchun chorsilab-chorsilab 
shudgorladam. 
Shudgor ketidan Dilnavoz soldim. 
Dilnavoz — dlina bazovoy gridyor noj — 4, degich texnika. U yer tekislaydi. Uzunligi o‘n 
qadamni oladi. To‘rt oyog‘i bilan to‘rt qulochlik ketmoni bo‘ladi. 
Bundaychikin bir quloch otni aytish uchun menda til qani? Bundaychikin otni aytish uchun menda 
vaqt qani? Bundaychikin otni aytaman degunimchayin kun kech bo‘ladi! 
Shu boisdai men uni Dilnavoz, deya atadim. Men ana shu Dilnavozim bilan shudgorni 
ko‘ndalanglab-ko‘ndalanglab haydadim. Shudgorni belidan qirqib-belidan qirqib haydadim. 
Dilnavozim bilan shudgor havorladim. 

---

Tog‘ay Murod. Otamdan qolgan dalalar (roman)