Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
150
— Men mehnat qila berdim-mehnat qila berdim — raisimiz ko‘tara berdi-ko‘tara berdi. 
— Kechirib qo‘yasan, baran, kechirib qo‘yasan! O‘zbekiston kattalari oldin bir nima oladi —ana 
undan keyin bardor-bardor etadi! 
— O‘lla o‘layin, agar-a... 
— Unda, qanday qilib paxta topshirishni uzluksiz bajarib kelding? Uzluksiz-a, uzluksiz! 
— Men yerga ter to‘ka berdim-ter to‘ka berdim — yer menga hosil bera berdi-hosil bera berdi. 
— Kechirib qo‘yasan, baran, kechirib qo‘yasan! Sen o‘zbeklar yerga ter to‘kmaysan! Yo‘q-yo‘q, 
sen o‘zbeklar yerga ter to‘kmaysan! Sen o‘zbeklar... yergayam pora berasan! Ha, sen o‘zbeklar 
yergayam pora berasan! Paxtalaringni deyarli yarim foizi qo‘shib yozilgan! Ha-ha, qo‘shib yozilgan! 
Qo‘shib yozish uchun esa — taxi buzilmagan «Lenin»dan uzatish lozim bo‘ladi! 
Endi ayt, raisingga nechta «Lenin» uzatding? 
— O‘ynab qo‘yay, «Lenin»dan, o‘ynab qo‘yay! Yo‘q «Lenin»ni qaerdan olaman? 
Ivan Ivanovich ho‘ppaklab-ho‘ppaklab quloq-chakkam soldi. 
Men o‘tirg‘ichdan jalpillab-jalpillab uchib tushdim. 
O‘ng quloq-chakkam qizib-qizib og‘ridi. O‘ng quloq-chakkam shang‘-shang‘ og‘ridi. 
Shu kundan e’tiboran o‘ng qulog‘im chippa-chippa bitdi-qoldi. 
20 
— Usmonxo‘jaevni bilasan-a? — dedi Ivan Ivanovich. 
— Esa-chi. U kishi poshshomiz bo‘ladilar! — dedim. 
— Ana shu poshshong O‘zbekiston bulbuli bo‘lib sayradi! Navoiy, Bobur... degich baran shoirlar 
g‘azallarida bulbullar xonish etadi-yu? Poshshong ana shunday bulbul bo‘lib xonish etdi! 
— Eb-e, u kishi-da zindonbandmi, eb-e? 
— Ha-da, zindonband-da! Lekin Usmonxo‘jaevning ayoli Elnurini gapga kiritib bo‘lmadi. Elnuri 
oylab bandi bo‘lib yotdi. «Ering Usmonxo‘jaev tamom bo‘ldi — endi eringdan kech», dedim. Qani 
kechsa! Boshiga it kunini soldim! Oxiri masalani ko‘ndalang qo‘ydim: «yo, eringdan kechasan, yo, 
joningdan kechasan», dedim. «Mayli, jonimdan kechaman, lekin erimdan kechmayman», dedi Elnuri. 
Ana ayol — mana ayol! Aytganda ham — yuzimga tupurib-yuzimga tupurib aytdi! Yuzimga tupursa 
ham mayli — baribir Elnuriga qoyil bo‘ldim! Ana shundan keyin butun o‘zbek ayollariga qoyil 
bo‘ldim! 
Ivan Ivanovich po‘latsandiqdan semizdan-semiz bir jildtaxlam olib kelib ochdi. 
— Xo‘-o‘sh, poshsho hazratingni Bosh Prokurorimiz o‘rnibosari o‘rtoq Vasilev so‘roq qildilar. 
Mana, so‘roq varaqasi. Quloq sol, ana shu so‘roqdan picha o‘qib beraman: 
VASILYeV: Siz bir necha bor SSSR Bosh Prokurori nomiga arznomalar bilan murojaat etibsiz. 
Siz bu arznomalarda qanday yo‘llar bilan pora olib-pora berganligingizni bayon etibsiz.
USMONXO‘JAYeV: Meni ushbu yil o‘n to‘qqizinchi o‘ktabrida zindonband etdilar. Men ilk 
kundanoq halol yo‘ldan bordim. Oqni oq, dedim, qorani qora, dedim! Barcha javobgarlikni bo‘ynimga 
olib aytdim. Tag‘in aytaman: ha, pora olib-pora berish 
— 
O‘zbekistondan Maskovgacha kundalik 
voqea edi!