Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
137
Men burchakda cho‘nqayib o‘tira berdim. Peshonamni tizzalarim qo‘yib o‘tira berdim. 
Dimog‘im bir is tuydi. 
Is dimog‘im uchun haminqadar qo‘lansa bo‘lsa... haminqadar qadrdon-da bo‘ldi. 
Is — butifos isi bo‘ldi! 
4 
Ikkita askar o‘rtasida bordim. 
Kun kunduzimi yo kechami — bilmadim. 
Qorag‘ilof eshikdan ichkariladim. 
To‘rda o‘tirmish baroqqosh katta joyidan turdi. Men bilan qo‘l berib ko‘rishdi. Bosh egib-bosh 
egib mulozamat etdi. 
Baroqqosh katta joy lutf etdi. 
— Marhamat, Dehqonqul Aqrabovich, marhamat! — dedi. 
Men baroqqosh katta marhamat etmish joy cho‘kdim. 
Baroqqosh katta o‘z joyini oldi. Bosh irg‘ab-bosh irg‘ab iljaydi. 
Baroqqosh katta betimdan ko‘z olmadi — bir chapimdan qaradi, bir o‘ngimdan qaradi. 
— Ko‘p qarab yotmang, — dedim. — Betim pes emas.
Baroqqosh katta tag‘in bosh irg‘adi. 
— A?.. — dedi. — Bo‘ladi, hayotda shunday dard bo‘ladi... Ammo yuqumli sanalmaydi... 
— Ellik daraja jaziramada ketmon chopamiz, ana shundan, — dedim. 
— Iya! — deya hayronlandi baroqqosh. — Unda nega yuzingiz bir tekis qora emas? 
— Saraton mahali dalada ko‘z ochib bo‘lmaydi. Ko‘zimizni qisib-qisib ketmon chopa beramiz. 
— Ha-a? Men boshqa xayolga boribman... 
— Bari ko‘rgilik kun bilan ketmondan. 
— Bo‘ldi-bo‘ldi, tushundim. Xo‘-o‘sh, unda, tanishib qo‘yaylik: men Ivan Ivanovich Ivanov 
bo‘laman. «O‘zbeklar ishi» bilan shug‘ullanaman. 
To‘rda bahaybat po‘latsandiq bo‘ldi. Sandiq uzra supraday qizil bayroq yoyilib turdi. 
Baroqqosh boshi uzra o‘rtoq Lenin kulib-kulib qarab turdi, 
O‘ng tarafda Dzerjinskiy qahrlanib-qahrlanib qarab turdi. 
Baroqqosh so‘ray berdi — men ayta berdim. Aytuvlarim xatga tusha berdi. 
Baroqqosh xat qarab xayol surib qoldi. 
— Endi bo‘ldi-a? — dedim. — O‘ziyam, yetti pushtimgachayin so‘rab oldingiz. Endi men 
ketayin. 
— Qayoqqa ketasiz? 
— Qayoqqa bo‘lardi — uyimga-da. Birinchi terim boshlandi. Men bo‘lsa, buyoqlarda yuribman. 
Aslida terimchilarga qo‘y so‘yib berishim lozim edi. Og‘ziga yetar bo‘ladi, og‘ziga yetmas bo‘ladi, 
so‘kadi-da. O‘l-a, mash’al brigadir bo‘lmay, deydi-da. Gap raisimiz qulog‘iga yetsa, undan-da yomon. 
Baroqqosh lablari burchida kuldi. 
— Jamoliddinov, Jamoliddinov! — deya kuldi. — Dehqonqul Aqrabovich, Dehqonqul 
Aqrabovich! Raisingiz shu yerda! 
— Shu yerda? 
— Ha-da. Siz bilan bir tayyorada keldi. 
— Eb-e?.. O‘ynab qo‘yay-o‘ynab qo‘yay, qaerda-qaerda? 
— Siz bilan qabatma-qabat yotibdi. Xo‘-o‘sh, qalay joylashdingiz, ma’qulmi? 
— Siz bilasiz-da, men ne bilayin? 
— Ishqilib, ozodaginami? 
— Ozoda? Butifos isi anqib yotibdi. Chidab bo‘lmaydi. 

---

Tog‘ay Murod. Otamdan qolgan dalalar (roman)