Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
136
— O‘ynab qo‘yay, oltin zotidan, o‘ynab qo‘yay. Oltin tilla do‘konda bo‘ladi-da. 
— Aytmaysanmi? Hali, aytasan! To‘pponchalik shunday deya, bilaklarimni juftladi. Shiqillatib 
kishan soldi. Kishan jilovini bilagidan o‘rab oldi. Darvoza oldida turmish mashina taraf yetakladi. 
O‘g‘limiz ketimdan ovoz berdi: 
— Ota-a-a!
To‘pponchalik meni mashina imladi. 
— Yo‘l bo‘lsin? — dedim. 
— Enangni uyiga! 
Men mashina kira bermadim. 
— Yo‘l bo‘lsin? Ertamatan birinchi terim boshlanadi? — dedim. 
Avtomatchilar meni itargilab-itargilab mashina bosdi. 
Mashina oynasidan uyimiz qaradim. 
Onamiz uy bo‘sag‘ada serraya-serraya qoldi. 
Bolalar onamiz tevaragida g‘uj bo‘lib-g‘uj bo‘lib oldi. 
O‘g‘limiz tag‘in ovoz berdi: 
— Ota-a-a!.. 
2 
Mashina zim-ziyoda yurdi-yurdi — bir ovloqni manzili jalol etdi. 
To‘pponchalik meni yetaklab tushdi. Hadaha bilan boshqa bir mashina soldi. 
Birinchi mashinada qolmish avtomatchilarga tayinladi: 
— Manavi chap yo‘ldan haydanglar, — dedi. — Mabodo mafiya quvib qolsa, bor tezlik bilan 
haydanglar! 
Mashinamiz o‘ngga burilib jo‘nadi. Biqinimda to‘pponcha qadalib-qadalib turdi. 
— Yo‘lda mafiyang daf’a qilib qolsa, manavi oyoq ostiga yotib ol! — dedi to‘pponchalik. — Sen 
bizga tiriklayin keraksan! 
— U kim? — hayronlanib so‘radim. 
— O‘zingni ovsarlikka olma! Biz barini bilamiz! 
Bir ko‘prik poyida tong otib qoldi. 
— Yorug‘ bo‘p ketdi-ya! — dedi to‘pponchalik. — Mashinani ko‘prik ostiga ol! 
Tong yorigandan-yoridi. «Halizamat birinchi terim boshlanadi», deya xayollandim. 
Mashina ko‘prik ostida oyoq ildi. 
— O‘zi, qayoqqa ketayapmiz? — dedim. — Halizamat terimchilar dalalab keladi. 
— O‘chir-o‘chir! 
To‘pponchalik oynadan tashqari alanglab-alanglab oldi. 
— Surxondaryocha mashina raqamlaring bor-a? — dedi haydovchiga. — Darrov raqamlaringni 
almashtir! Surxondaryocha raqam qo‘y! 
Haydovchi apil-tapil mashina old-ket raqamlarini almashtirib-almashtirib oldi. Mashina tag‘in yo‘l 
ravona bo‘ldi. Mashinadan tayyora pillapoyasilab oyoq bosdim. Tayyora yerdan oyoq oldi. 
— Xudoga shukur-e! — deya yelkadan nafas oldi to‘pponchalik. — Mafiyangga ham chap berdik! 
3 
Tom — tosh bo‘ldi. 
Devor — tosh bo‘ldi. 
Yer — tosh bo‘ldi. 
Toshlar zaxdan-zax bo‘ldi! 

---

Tog‘ay Murod. Otamdan qolgan dalalar (roman)