Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
104
Mototsiklimni kasalxona darvozasi oldida qoldirdim. Ichkarilab chopdim. 
Qabulxonada odam mo‘l bo‘ldi. Birov kasalxona kiyimida bo‘ldi. Birov ko‘cha-ko‘y kiyimida 
bo‘ldi. 
Men dardimni tuynukdan aytdim. 
Oq xalatli yigit bosh irg‘adi. 
— Bilaman, olib keldi, bilaman, — dedi. 
— Ichkari kiraman, — dedim. 
— Yo‘q, mumkin emas. 
— Men... men xo‘jayini bo‘laman. 
— Qat’iy nazar, bemorga hozir tez yordam ko‘rsatilmoqda. 
U dedim, bo‘lmadi, bu dedim, bo‘lmadi. 
— Bo‘lmasa, momoni chaqirib bering? — dedim. 
— U kim? 
— Bizni enamiz. 
— Ha-ha, yonida bir kampir bor edi, o‘sha-da? Bu mumkin! 
Qabulxonada bari-bari menga qaradi. Birov achinib qaradi. Birov qayg‘urib qaradi. Birov bosh 
chayqadi. Birov bosh irg‘adi. Qabulxonada pichir-pichir boshlandi. 
— Erkagi ekan, sho‘rpeshonani erkagi ekan. 
— Hay, bechora-e, bechora. 
— E, tavba-e, tumanda bir oyda to‘rtta shunday ko‘rgilik bo‘ldi-a? 
— To‘rtov bo‘ldimi-a? 
— Esa-chi. Jobida birov, Mo‘minqulda birov, Sayrakda birov, bunisi bilan to‘rtov. 
— Qanday zamon bo‘ldi-a? 
— Oldinlariyam ko‘p bo‘lib edi, bildirishmadi. Endi bildirishayapti. 
— Ko‘rasiz, hali shuniyam bosdi-bosdi etadilar. 
— U-ku, chin. Oldingi to‘rttasiniyam bosdi-bosdi etdilar. 
— Oyday-kunday ko‘rinib turgan kuyikni qaytib bosdi-bosdi etadilar? 
— Eb-e, jo‘qchi desa, jo‘qchi deguliksan-da, eb-e. Kattalarni oldida oqni qora deyish nima degan 
gap... 
Oq xalatli yigit telefonda birov bilan gapirishdi. 
— Bir chetga? Bo‘pti, bir chetga, bo‘pti, — dedi. 
Yigit bilagimdan ushlab hovli yetakladi. Qo‘li bilan bir chetni — quyuq daraxtlar ostini ko‘rsatdi. 
— Ana o‘sha o‘tirg‘ichga borib o‘tirib turing, kampirni hozir yuboraman, — dedi. — Shovqin-
suron qilmay, tinchgana o‘tiringlar. 
— Kim shovqin qilayapti? 
— Siz emas, kampir shunday ekan. Kampir kelganda shunday baqirib-chaqirdi, shunday shovqin-
suron qildi, kasalxonani boshiga ko‘tardi! Shunga, bosh vrachimiz shovqin qilmasin, chetroqda 
gaplashsin, deyapti. Endi siz erkak odamsiz, kampirga aytib qo‘yasiz-da. 
Men yigit aytmish xilvat borib o‘tirdim. Oyoq uzatib o‘tirdim. 
14 
Sag‘al o‘tdi — onamiz paypanglay-paypanglay keldi. 
Onamiz rangida rang bo‘lmadi. Onamiz ko‘zlari shish-shish bo‘ldi. Onamiz burunlari oqib-oqib 
yotdi. 
Onamiz qabatimdan joy oldi. Doka ro‘moli bilan og‘zini ushlab... sel-sebor yig‘ladi. 
— Ko‘rgiliging ko‘p bo‘lsin, sendaychikin erkakni! — dedi. 
— Eb-e, men sizga nima qildim? 

---

Tog‘ay Murod. Otamdan qolgan dalalar (roman)