Microsoft Word pc 3 ziyonet doc

Оптик дисклар (CD, DVD, Blue Ray).
Оптик диск юритувчилар. 1983 йил Sony компанияси CD ROM (Compact Disc Read Only Memory – компакт диск, фақат ўқиладиган хотира) дискларни ва улар учун диск юритувчиларни бозорга чиқарди. 70 минутли олий сифатли стереомусиқани рақамли кўринишда ёзиш учун мўлжалланган компакт диск сиғими 650 МБ га тенг эди. Ўша пайтдаги оммавий компьютерларнинг тезкор хотираси 128 КБ, сотувдаги винчестерларнинг ҳажми 5 МБ эди.
Компакт дисклардаги маълумот винчестерлардаги каби электромагнит тебранишлар ёрдамида эмас, балки ёруғлик нурлари асосида ишлайдиган лазер қурилмалари ёрдамида ўқилади ва ёзилади.
Ҳозирги пайтда 700 МБ ли компакт дисклардан фойдаланилади. Компакт дискларнинг уч туридан фойдаланилади. CD ROM дан ташқари, CD R ва CD RW деб аталадиган компакт дисклар мавжуд. CD R диск (Recordable – ёзиш мумкин бўлган) ларга махсус диск юритувчи қурилма ёрдамида бир марта ахборот ёзиш мумкин. CD RW (Rewritable – қайта ёзиш мумкин бўлган) дискларга бир неча (мингтагача) марта қайтадан ахборот ёзиш мумкин. Уларга мос равишда CD ROM, CD R ва CD RW диск юритувчи қурилмалар яратилди.
1995 йил янги турдаги оптик дисклар DVD (Digital Video Disk) лар яратилди. Улар компакт дисклардан катта сиғимлари билан ажралиб турадилар. Юқори частотали лазерлардан фойдаланиш ва дискдаги ҳалқалар орасидаги масофани камайтириш ҳисобига битта дискка 4,7 ГБ сиғимли дисклар яратиш мумкин бўлди. Дискка икки қатлам қилиб ахборот ёзиш ҳисобига диск сиғимини 8,5 ГБ гача, икки томонига ёзиш ҳисобига 17 ГБ гача етказиш мумкин бўлди.
DVD дискларнинг компакт дисклардан фарқли равишда ўзаро мос келмайдиган иккита стандарти мавжуд эди. Бу фойдаланувчилар орасида бир қатор қийинчиликлар туғдирар эди. Бугунги кунда бу муаммолар ортда қолди ва DVD диск юритувчилар барча дискларни ўқий олади. DVD дискларнинг ҳам компакт дисклар каби DVD ROM, DVD R, DVD RW турлари ва диск юритувчилари мавжуд. DVD диск юритувчилар компакт дискларни ҳам ўқий оладилар.
Blue Ray дискларининг ҳажми 25 ГБ бўлиб, улардан DVD стандартидан ҳам юқори сифатли HD (High Definition – юқори аниқликдаги) ва Full HD – тўлиқ юқори аниқлик стандартидаги теле кўрсатувлар ва видеоматериалларни сақлаш учун фойдаланилади. HD стандартида ҳар бир кадр 1280Х720, Full HD да 1920Х1080 ўлчамга эга бўлади.