Microsoft Word murdalar ziyouz com doc

QONLI GIRDOB 
Abduqayum yanglishmadi: Samandar o‘sha kuni uyiga kelgandi. Aslida uning uyga 
kelish niyati yo‘q edi. Rejasi bo‘yicha, Nafisa ta’tilga chiqmog‘i, u esa vertolyotni 
shaharga jo‘natmog‘i lozim edi. Odam yetib kelishi mushkul bo‘lgan, ammo tabiatning 
mavjud go‘zalliklarini o‘zida mujassam etgan bu darada Nafisa uzog‘i bilan bir hafta 
chidab yashay olardi. Cho‘lda o‘sgan bu juvonni go‘zal manzaralar ham, tongda 
bulbullarning sayrashi ham, pokiza buloq suvlari ham maftun qila olmasdi. Bir necha 
olimu xizmatkorlardan iborat bu «shaharcha»ga dastlab kelganidayoq «zindonning o‘zi-
ku, bu yer» deb baho bergan, uch kunga arang chidagan edi. Samandarning birinchi 
xotini ham toqqa toqat qila olmasdi. U chodir atrofida o‘rmalab yurgan ilonni 
ko‘rganidayoq chinqirib olamni buzgan, shu-shu bu yoqqa qadam bosmay qo‘ygan edi. 
Samandar Nafisada ham birinchi xotinining qiliqlaridan bor ekanligini sezib g‘ashlandi-
yu, keyin o‘z ishlari bilan andarmon bo‘lib e’tibor bermay qo‘ydi. 
Tursunali qamalgach, Nafisa bir necha hafta garangsib yurdi. Hatto eriga qaramay 
ham qo‘ydi. Samandar «juda yaxshi ko‘rar ekan-da», deb o‘yladi-yu, ammo xayoliga 
kelgan gaplarni tiliga chiqarmadi. Aksar odamlar tish faqat ovqat chaynash uchun 
mavjuddir, deb hisoblaydilar. Samandarning tishlari esa, ikkinchi vazifasini — tilga 
qo‘riqchilik yumushini ham bajaradi. Uning tili bekordan bekorga tish hatlamaydi. 

---

Murdalar gapirmaydilar (qissa). Tohir Malik