Microsoft Word muminning sifatlari ziyouz com doc

---

Мўъминнинг сифатлари. Муҳаммад Зоҳид Қўтқу 
www.ziyouz.com кутубхонаси 
1
МУҲАММАД ЗОҲИД ҚЎТҚУ 
ИБН ИБРОҲИМ АЛ-БУРСАВИЙ 

 
М Ў Ъ М И Н Н И Н Г 
С И Ф А Т Л А Р И
 
Нашрга тайёрловчилар: НОДИРХОН ҲАСАН, 
АБДУЛАЗИЗ МУБОРАК 
Масъул муҳаррир: Сайфиддин САЙФУЛЛОҲ 
 
 
Тошкент - 2004 
МУҚАДДИМА 
Бугунги кунда Имом Бухорий, Имом Термизий ва бошқа муҳаддислар тартиб берган 
ҳадис китоблари таржима қилиниб, халқимиз қўлига етиб борди ва уларни маънавий 
баҳраманд этмоқда.
Маълумки, ҳадиси шарифлар кишиларни дунёда ва охират ҳаётида бахтли-саодатли 
бўлишлари учун йўл кўрсатувчи чироқ ҳукмидадир. 
Ўтмиш тарихимизга назар ташласак, Қуръон оятлари ва ҳадиси шарифлар маънавий 
ҳаётимизнинг барча қатламларига – маданият, санъат ва адабиётга чуқур таъсир 
кўрсатганлигини кўрамиз. Зеро, Аҳмад Югнакий, Юсуф Хос Ҳожиб, Маҳмуд Кошғарий каби 
қадимги давр адабиёти вакиллари ҳам, Аҳмад Яссавий, Алишер Навоий, Заҳириддин Муҳаммад 
Бобур, Бобораҳим Машраб, Огаҳий, Фурқат сингари тасаввуф ва мумтоз адабиёт намояндалари 
ҳам ўз ижодларида ҳадиси шарифларнинг талқини, изоҳ ва шарҳларига кенг ўрин 
ажратганлар. 
Демак, маънавиятимиз сарчашмаларидан хабардор бўлиш маъносида ҳам ҳадиси 
шарифларни ўқиб-ўрганмоқ, унда дарж этилган мавзу ва масалаларни англаб, идрок айламоқ 
ҳамда уларни ҳаётга тадбиқ этмоқ бир эҳтиёждир. 
Худди шунинг учун ҳам ҳадиси шарифларни турли шаклларда баён қилиш, хусусан қирқта 
ҳадисни шарҳлаш ва шеърий йўл билан халққа етказиш Шарқда анъана бўлиб келган. Ҳазрати 
Абдураҳмон Жомий ва ҳазрати Алишер Навоийлар ҳам бу анъанага содиқ қолганлар. 
Имом Аъзам мазҳабининг зукко билимдони, нақшбандия тариқатининг муршиди комили, 
шайх Муҳаммад Зоҳид Қўтқу ҳазратлари ҳам бу йўлдан бориб, мўъмин-мусулмоннинг дину 
диёнати, ахлоқ-атвори, ҳалол-покизалиги билан боғлиқ қирқта ҳадисни шарҳлаб, “Мўъминнинг 
сифатлари” номи остида китоб чоп эттирганлар. 
Бу асар мўъмин-мусулмонларни ҳалолликка, покликка даъват этиши билан алоҳида 
эътиборга молик. Унда ҳар бир иймон соҳибининг эга бўлмоғи лозим бўлган сифатлар, хислат 
ва фазилатлар хусусида атрофлича фикр-қарашлар баён этилган. 
Бугунги кун эҳтиёжидан келиб чиқиб нашрга тайёрланган бу китоб халқимиз ва ватанимиз 
фаровонлиги йўлида қўшилган бир улуш дейиш мумкин. Уни ўқиб, баҳолаш эса ўқувчилар 
ҳукмига ҳавола.