Microsoft Word mantiqut-tayr ziyouz com doc

JON BERAYOTGAN BUQROT VA UNING SHOGIRDI HIKOYASI 
 
Buqrot hakim kasal bo‘lib yotib qoldi, ajali yetib, jon berish azobidan qiynalardi. Bir 
shogirdi bor edi, u ustoziga qarab dedi:  
- Ey ustoz, tanangni yuvib kafanlab dafn etgandan keyin, ayt, seni qaerdan topamiz?  
Buqrot dedi:  
- Ey g‘ulom, Men tirikligimda uzoq umr ko‘rib, o‘zimni o‘zim topolmadim, sen meni 
qaerdan topasan? Men shunday yashab dunyodan o‘tayapmanki, qilcha o‘zimdan 
xabardor emasman. O’limga o‘limdan o‘zga davo yo‘q, har qancha zorlanma, xazon 
bo‘lgan barg yerga tushadi. Biz hammamiz o‘lish uchun tug‘ilgan-miz, dunyodan ko‘ngil 
uzolmasak ham, jonimiz bizni tark etadi. Butun dunyoni hukmronlik muhri ostida tutgan 
shohanshohlar bugun yer ostida yotibdi. Shohmi, xusravmi, xonmi, amirmi, barchasi 
lahad tuprog‘ida, arzimas tuproqqa tengdirlar. Shohbo‘lsin, gado bo‘lsin — hammasi 
ketadilar. 
Oxiratda Noqis va komil orasidagi farqlar ayonlashadi. Tiriklik ham azob, o‘lim ham 
azob, agar bu har ikki ranju azobingdan ganj - xazina topmasang, bilgilki, haqiqiy ganj 
— Simurg‘dir. Qolganlari esa dardu azobdir. Shu bois dunyoda bundan ortiq ganjni 
izlama. 
 

---

Mantiqut-tayr (nasriy bayon). Farididdin Attor